25.05.2019 |
Viure als Pirineus

ARCHIU GENERAU D'ARAN

Neish eth Club de Lectura de Documents Antics dera Val d’Aran

Es participaires s'amassen un dissabte ath mes en Archiu Generau d’Aran entà liéger e trabalhar documents depausadi

Club lectura documents antics Aranjpg
Club lectura documents antics Aranjpg
Neish eth Club de Lectura de Documents Antics dera Val d’Aran

Eth 9 de junh, Dia Internacionau des Archius, s'organizèc a en Archiu Generau d’Aran un talhèr de lectura de documents antics dera Val d’Aran. Era activitat auie coma objectiu aufrir es prumères pautes entara lectura de documents produsidi en Aran entre es sègles XIV-XIX. Era metodologia deth talhèr combinèc era explicacion d’uns concèptes basics damb era realizacion d’uns exemples practics, que promoigueren era participacion des assistents.
Un còp finalizada era activitat, es participaires prepausèren contunhar damb era experiéncia. Dempús de quate sessions, s’a creat eth Club de Lectura de Documents Antics dera Val d’Aran. Un dissabte ath mes, entre 10 e 12 persones, se tròben en Archiu, coordinadi pera directora Maria Pau Gómez, entà liéger e comentar dus o tres documents.

CLUB LECTURA

FOTO:Xarxa d'Arxius Comarcals (XAC)

En aguesti moments, es documents que se trabalhen hèn part deth hons patrimoniau Çò de Sebastian e Marionha de Vilac. Era lectura se centre en conéisher era vida deth doctor en medecina Fèlix Demiguel Estreme (1697-1778). Eth doctor se maridèc tres còps e a trauès des capítols matrimoniaus, entre eth e es sues tres hemnes, des documents dotals, des dera administracion deth sòn auviatge e deth sòn testament, se coneishen notícies de coma siguec era sua vida en sègle XVIII.
Un còp trabalhat es documents, es membres deth Club de Lectura vòlen redigir un article e publicar-lo en pròplèu numèro dera revista Tèrra Aranesa dera Fondacion deth Musèu Etnologic dera Val d’Aran.

Comentarios