EQUIPAMENTS

Naut Aran insonorize era Sala Polivalenta

Eth pressupòst totau ascendís as 39.000 èuros, que, 35.000 èuros se subvencionaràn per ua ajuda d’Espòrts dera Generalitat de Catalonha.
Naut Aran Insonorizacion Sala Polivalenta 1
photo_camera Naut Aran insonorize era Sala Polivalenta / @ajnautaran

Er Ajuntament de Naut Aran trabalhe ena insonorizacion dera Sala Polivalenta plaçada en pòble de Salardú damb er objectiu de milhorar era sonorizacion d'aguest complèx poliesportiu entà poder acuélher actuacions musicaus, presentacions o d’auti eveniments d'ua forma fòrça mès eficienta e excellenta.

Pendent es darrèri ans s'apraièc eth tet d'aguesta installacion pr'amor que qu'ère hèt damb fibra de veire. En renauí'c damb un sistèma de chapat, se perdec grana part dera sonoritat deth complèxe e, ei per açò, que s'a decidit actuar entà poder milhorar en aguest aspècte. Eth baile deth consistòri, César Ruiz-Canela, explique que “auem estat damb aguest problèma pendent diuèrsi ans e ara decidim solventar-lo damb era seguretat que, segontes es nòsti estudis, milhoraram d'un 70% ath 80% en çò que tanh ara sonoritat dera Sala Polivalenta”.

Naut Aran Insonorizacion Sala Polivalenta 2
Naut Aran insonorize era Sala Polivalenta / @ajnautaran

Era reverberacion actuau ère de 5 a 6 segons e damb aguestes accions se demore poder arribar a 1 segon de reverberacion. S'an installat pannèus fonoabsorbents que garantiràn aguesta situacion e permeteràn poder gaudir d'ua manèra completaments diferenta d'actes coma per exemple es pròplèu hèstes de Santa Creu de Salardú a principis de mai.

Eth pressupòst totau dera accion ascendís as 39.000 èuros, que, 35.000 èuros se subvencionaràn per ua ajuda deth Departament d’Espòrts dera Generalitat de Catalonha.

Més a Val d'Aran