Era iniciativa forme part dera apòsta dera EMD entà consolidar ua programacion establa que combine arts esceniques, musica, gastronomia e patrimòni, en tot apropar era cultura autant as vesins de Bagergue coma as visitants dera Val d'Aran.
Era prumèra edicion de Dimenges de Plaça començarà eth pròplèu dimenge 19 de juriòl, tàs 18.00 ores, damb ua proposicion de prumèr nivèu: Corta el Cable Rojo, considerada ua des companhies d'improvisacion teatrala mès prestigioses der Estat. Dempús de mès de tretze ans consecutius d'èxit ena Gran Via de Madrid, aguest espectacle arribe en Bagergue entà transformar era Plaça Planhèra en un gran teatre ath aire liure.
Er exit de Corta el Cable Rojo radique en hèt que non i a cap foncion parièra ara anteriora. Es actors pugen ar scenari sense cap guion preestablit e ei eth madeish public qui, damb es sues idies, paraules, situacions o personatges, bastís es istòries que se representen en dirècte. A compdar d'aguesti suggeriments, es intèrprets improvisen escenes plies d'umor, creativitat e ritme, en tot demostrar ua extraordinària capacitat de reaccion que convertís cada representacion en ua experiéncia unica e irrepetibla.
Er espectacle combine teatre, umor e improvisacion damb ua grana participacion deth public, que deishe d'èster un simple espectador entà convertir-se en protagonista dera foncion. Aguesta proximitat entre artistes e assistents encaishe plenament damb er esperit de Dimenges de Plaça, un projècte que vò recuperar era plaça coma espaci de convivéncia, participacion e vida collectiva. Portar ua produccion d'aguest nivèu enquia Bagergue represente tanben ua aposta entà apropar espectacles professionaus de gran format as municipis de montanha, en tot aufrir ua programacion culturau que, abituaument, sonque se pòt gaudir enes granes ciutats.
Eth cicle contunharà eth dimenge 11 d'octobre, tàs 12.00 ores, damb un Vermot Musicau, ua proposicion que combinarà musica tradicionau e balh de plaça damb ua mòstra gastronomica de productes de proximitat. Era jornada plaçarà en valor era musica tradicionau deth Pirenèu, es insturments pròpis dera cultura populara de montanha e era gastronomia de Bagergue, damb especiau protagonisme des hormatges artesanaus, es productes locaus e ua seleccion de begudes dera Val d'Aran e deth conjunt deth Pirenèu. Aguesta dusau activitat reforçarà eth ligam entre cultura, territòri e patrimòni, en tot recuperar era esséncia des places des pòbles.
Aguest nau cicle culturau ei possible gràcies ara collaboracion der Institut d'Estudis Ilerdencs dera Deputacion de Lleida e deth Departament de Cultura dera Generalitat de Catalunya, institucions que, damb eth sòn supòrt, contribuïssen a hèr possible ua programacion culturau establa e de qualitat enes municipis de montanha, en tot apropar era cultura ath territòri e en tot reforçar era coesion sociau e era dinamizacion culturau de Bagergue.
Damb Dimenges de Plaça, era EMD de Bagergue reafirme eth sòn compromís damb ua cultura de qualitat, dubèrta e accessibla, capabla de generar coesion sociau e dinamizar era vida deth pòble de Bagergue.
Programacion 2026
- Dimenge 19 de juriòl · 18.00 ores
CORTA EL CABLE ROJO
Plaça Planhèra · Bagergue
- Dimenge 11 d'octobre · 12.00 ores
VERMOT MUSICAU
Musica tradicionau e balh de plaça · Gastronomia de Bagergue
