Era naua ubicacion a estat escuelhuda pera sua foncionalitat, accessibilitat e visibilitat. Emplaçada en principau punt d'accès ath nuclèu, facilitarà qu’es visitants poguen localizar rapidament aguest equipament abans d'iniciar era sua visita ath pòble, aufrint un servici essenciau en un espaci adaptat e de facil accès.
Bagergue ja dispausec pendent fòrça ans d'un servici de banhs publics pendent era sason d'ostiu, plaçadi en edifici dera Sala Sociau dera EMD, en Camin Pessòla, 6. Aguest equipament a prestat un servici fòrça valuós autant entàs visitants coma entàs vesins e a permetut dar responsa a ua besonh reau existenta en pòble.
Eth president dera EMD de Bagergue, Marc Tarrau, destaque que «Bagergue aufrís de hè fòrça ans un servici de banhs publics pendent era sason d'ostiu ena Sala Sociau e mos an dat fòrça bon servici. Aguesta actuacion non substituís aqueth servici, senon que represente un pas entà deuant entà adaptar-mos as besonhs actuaus deth pòble e ath gran nombre de visitants que recebem cad’an».
Maugrat era bona foncionalitat des banhs existents, era sua ubicacion ena part nauta deth pòble hège que fòrça visitants non ne coneishessen era existéncia o non les localizèssen damb facilitat. Aguesta situacion provocave que, en fòrça ocasions, es visitants utilizèssen es servicis des bars, restaurants e d'auti establiments deth pòble.
En aguest sens, Tarrau assenhale que «fòrça visitants non trapauen es banhs publics e acabauen utilizant es servicis des establiments deth pòble. Credem qu'aguesta ei ua besonh que deu èster atenguda des administracions publiques e non requèir exclusivament sus es negòcis privadi».
Es naui servicis sanitaris publics adaptadi permeteràn dar ua responsa mès adequada ad aguesta realitat, en tot melhorar era experiéncia des visitants e ath madeish temps redusint era pression sus es establiments locaus.
Era actuacion compde damb un pressupòst d'execucion de 25.613,28 èuros e se finance gràcies a ua subvencion deth Plan Unic d'Òbres e Servicis de Catalonha (PUOSC) dera Generalitat de Catalunya, complementada damb hons pròpis dera EMD de Bagergue.
Segontes eth president dera EMD, «gràcies ath supòrt dera Generalitat de Catalunya a trauès deth PUOSC e ar esfòrç economic dera EMD auem podut hèr realitat un projècte que mos permeterà dispausar d'uns banhs publics adaptadi, modèrns e accessibles en ua ubicacion fòrça mès logica e practica».
Era ubicacion escuelhuda, en aparcament dera entrada deth pòble, respon precisament ara volentat de facilitar-ne er emplec. «Ei eth principau punt d'arribada des visitants que venguen a conéisher Bagergue. Plaçar ací aguest equipament permeterà que sigue visible dempús deth prumèr moment, facilitarà era sua utilizacion e melhorarà era experiéncia de totes es persones que visiten eth nòste pòble», explique Tarrau.
Eth president considère qu'aguesta ei ua actuacion que benefície eth conjunt deth pòble de Bagergue. «I gessen guanhant es visitants, que dispausaràn d'un servici adequat e accessible; i gessen guanhant es vesins, que auràn un nau equipament public; e tanben i gessen guanhant es establiments, que deisharàn d'assumir ua foncion que correspon as servicis publics», afirme.
Es òbres avancen segontes eth calendari previst e era prevision ei que es naui servicis sanitaris publics entren en foncionament pendent era prumèra setmana de junhsèga, en tot coincidir damb er inici dera sason d'ostiu.
«Arribaram ar ostiu damb un equipament modèrn, accessible e plaçat en lòc mès adequat entà dar servici autant as visitants coma as vesins. Ei ua actuacion simpla mès fòrça de besonh, que refortilhe era qualitat des servicis qu'aufrís Bagergue», concludís Marc Tarrau.
