Miguel Almansa Filloy declaraue que, “aguestes eleccions son de grana importància entà Aran, qu’a de besonh de hèr-se a escotar e hèr arribar es sues reivindicacions en Parlament de Catalunya". En aguest sens, era Secretaria Generau d’UA Maria Vergés higie, “ei vitau hèr efectius es compromisi e inversions deth govèrn dera Generalitat de Catalunya damb Aran, e qu'aguest trabalhe entath desvolopament e traspàs e melhora de competéncies. Tad aquerò ei imprescindible qu’eth govèrn dera Generalitat demòstre era sua empatia cap a Aran e reconeishe e respècte era sua singularitat, credem qu'açò sonque ei possible a trauès deth PSC, qui, quan a governat era Generalitat, a demostrat damb hèts e inversions era sua preocupacion per Aran".
Miguel Almansa Filloy a 26 ans e ei graduat en Economiques. Atau madeish, a un master en Direccion Financèra, damb experiéncia laborau en sector financèr. Implicat en associacionisme locau dera sua joenessa ençà, encetèc era sua vinculacion damb era politica aranesa en 2015, en tot èster militant actiu d'Unitat d'Aran des d'alavetz. Actuauments ei Secretari d'Accion Politica e Joenessa d'UA. Almansa, ocupe eth cincau lòc ena lista deth PSC per Lleida entestat per Òscar Ordeig.
Atau e coma a manifestat en reiterades ocasions, entà Unitat d’Aran ei primordiau qu’Aran age representacion enes disparières institucions de dehòra deth territòri, entà transméter es besonhs e era realitat deth país e poder deféner atau, es interèssi dera Val d'Aran, en tot dar pas as joeni entà qu'eth país contunhe present enes principaus lòcs de decision.
