24.11.2020 |
Viure als Pirineus

MIEI AMBIENT

Decomís de dus exemplars de cèrvi femelha ena zòna de Montgarri

Es Agents de Miei Ambient, amassa damb es Mossos d’Esquadra, an amiat a tèrme disparières accions damb er objectiu de comprovar eth compliment dera normativa vigenta en matèria de caça
Agents de Miei Ambient deth Conselh Generau d’Aran an realizat diuèrses actuacions /CGA
Agents de Miei Ambient deth Conselh Generau d’Aran an realizat diuèrses actuacions /CGA
Decomís de dus exemplars de cèrvi femelha ena zòna de Montgarri

Der inici dera tempsada de caça ençà, es Agents de Miei Ambient deth Conselh Generau d’Aran an realizat diuèrses actuacions damb era finalitat de comprovar eth compliment dera normativa vigenta en matèria de caça e des plans tecnics de Gestion Cinegetica dera Val d’Aran.

Enes disparières actuacions realizades pes Agents en matèria de caça major e menor s’a comprovat qu’es caçaires auessen era documentacion en regla entà realizar aguesta activitat. En aguest sens, cau rebrembar qu’ei obligatòri èster en possession dera licéncia de caça, permís d’armes e assegurança de danhs a tresaus, tanben ei de besonh èster major de 14 ans (damb autorizacion deth representant legau enquiara majoria d’edat) e èster en possession dera tarjeta credenciau de caçaire locau e deth carnet de caça menor o permisi nominaus corresponents.

En aguesti contròls se constate tanben era corrècta identificacion des animaus abatuts gràcies as precintes facilitadi pes Societats de Caça dera Val d’Aran, atau coma uns auti aspèctes de seguretat coma era senhalizacion des mautes, er usatge d’armilhes reflectants o era corrècta manipulacion des armes de huec, entre d’auti.

Coma resultat des disparières inspeccions realizades per part des Agents de Miei Ambient, amassa damb es Mossos d’Esquadra,en aguesti darrèri dies s’a amiat a tèrme eth decomís de dus exemplars de cèrvi femelha ena zòna de Montgarri per èster caçades dehòra deth periòde vigent de caça d’aguesta espècia.

Ei de besonh rebrembar que damb era publicacion dera naua Lei 5/2020, deth 29 d’abriu s’an actualizat es impòrts des sancions en airau dera caça: es infraccions lheus supausen ua sancion de 60 a 300 euròs, es mens grèus de 301 a 1.000 euròs, es infraccions grèus anaràn des 1.001 as 3.000 euròs, e es infraccions molt grèus supausen sancions d’entre 3.001 a 120.000 euròs, ath delà dera retirada dera licéncia de caça de 2 a 5 ans.

Caça Aran bis

Decomís de dus exemplars de cèrvi femelha ena zòna de Montgarri
Comentarios
Entrando en la página solicitada Saltar publicidad