Eth govèrn deth Conselh Generau d’Aran, a trauès deth sòn Plan de Sostenibilitat Toristica, a impulsat es prumères Jornades Gastronomiques dera Val d’Aran en Barcelona, en tot balhar era oportunitat de descurbir era nòsta gastronomia dera man de quate chefs dera nauta codina aranesa ena ciutat pendent es dies 5 e 18 de hereuèr.
“Damb aguestes Jornades Gastronomiques volem daurir ua hièstra ara excepcionau codina d’autor damb era que compde era Val d’Aran” manifestaue eth vicesindic e conselhèr de Governacion, Innovacion, Economia e Torisme, Amador Marqués, en tot híger que: “deth departament de Torisme deth Conselh Generau d’Aran ençà trabalham entà dar a conéisher non sonque eth nòste territòri, tanben era nòsta singularitat e cultura, dera qu’era gastronomia n’ei ua part importanta”.
Es chefs aranesi Josep Gregorio (El Portalet), Albert Jubany (Eth Bistró), César Mory (Es Arraïtzes) e Marc Nus (Era Coquèla) compden damb ua grana trajectòria ena nauta codina, reconeishuda pes principaus guides e prèmis internacionaus.
En Barcelona, gràcies ad aguest projècte, uèit plats d’aguesti quate chefs dera nòsta tèrra se poiran gaudir enes restaurants Batea, La Sosenga, Maleducat e Taberna Kamikaze, en format dehòra carta o includit enes menús degustacion.
