ARAN-GENERALITAT

Amassada deth sindic d’Aran Carlos Barrera e eth vicesindic Cesar Ruiz Canela damb eth President Quim Torra

Eth Govèrn dera Generalitat celebrarà ua amassada deth Conselh Executiu ena Val d’Aran a principi de 2019

sindic President Torra 2 (1)
photo_camera Eth sindic d'Aran damb eth President Quim Torra/Conselh Generau d'Aran

Eth sindic d’Aran, Carlos Barrera e eth vicesindic Cesar Ruiz Canela, s'amassèren ièr en Palau dera Generalitat damb eth President Quim Torra. Ara amassada tanben a assistit Miquel Àngel Escobar, secretari d'Administracions Locaus e relacions damb Aran dera Generalitat de Catalonha.

Pendent era amassada eth sindic d’Aran, informèc ath President sus es negociacions qu'amie a tèrme eth Conselh Generau d’Aran damb es desparièrs departaments dera Generalitat.

Eth President Quim Torra, que se mostrèc fòrça interessat per toti es ahèrs d’Aran, a comunicat ath sindic d’Aran era sua intencion de celebrar ua amassada deth Conselh Executiu deth Govèrn dera Generalitat ena Val d’Aran abans de finalizar eth mes de hereuèr deth pròplèu an, entà testimoniar eth sòn respècte entara Val d’Aran.

Pendent era amassada, eth sindic d’Aran e eth vicesindic an aufrit ath President un exemplar dera Lei d’Aran coma arrebrembe dera amassada.

En finalizar era amassada, eth sindic d’Aran, Carlos Barrera, expliquèc qu'aguesta prumèra amassada damb eth President Quim Torra, s’a desvolopat laguens un climat d'interès e de volontat per part dera Generalitat de Catalonha entà complir damb eth desvolopament dera Lei d’Aran.

Reunió Aran

Anterioraments, ath meddia, era comission negociadora deth nau modèl de finançament entà Aran, integrada peth sindic d’Aran, Carlos Barrera, eth vicesindic, Cesar Ruiz Canela, e eth pòrtavotz d’Unitat d’Aran en Conselh Generau d’Aran, Francés Boya, acompanhadi per tecnicians en gestion economica deth Conselh Generau, s'a amassat damb es responsables deth Departament d'Economia dera Generalitat damb era fin de fixar es bases deth nau modèl de finançament dera Val d'Aran, coma s'acordèc ena darrèra amassada dera Comission Bilaterau Generalitat-Conselh Generau d’Aran celebrada eth passat 18 d'octobre. Eth sindic d’Aran, Carlos Barrera, exposèc era prepausa deth Conselh Generau d’Aran, que, entre d'auti, vò recuperar era partida entad exercici der autogovèrn, qu'anterioraments se didie de politiques pròpries, e qu'ei frut der estudi encargat en 2014 peth Conselh Generau d’Aran ara Universitat de Barcelona (UB). Era pròplèu amassada sus eth nau modèl de finançament entà Aran s'a fixat entath pròplèu 20 de deseme.