Aguesta setmana, eth Ministèri de Transicion Ecologica e eth Rèpte Demografic a comunicat ar Ajuntament de Vielha e Mijaran era obtencion dera subvencion per valor d’1.016.519,76 € per part des hons Next Generation concedidi pera Union Europèa entà renauïr er enlumenat public de tot eth municipi.
Gràcies a d’aguesta subvencion, eth consistòri realizarà era substitucion de 2.494 punts de lum existenti enes diuèrsi pòbles de Vielha e Mijaran, en tot installar-ne de naui damb tecnologia LED, basadi en un nau enlumenat eficient e intelligent damb tecnologia Smart Rural e TIC. Ua mesura contra era contaminacion luminica e que garantirà un estauvi en consum annau ath torn deth 50% dera energia primària.
Era subvencion s’emplace en marc deth Programa de Regeneracion e Rèpte Demografic deth Plan de Recuperacion, Transformacion e Resiliéncia deth govèrn espanhòu, e eth projècte a un pressupòst totau d’1.213.021€.
“Èm fòrça satisfets peth trebalh realizat e per auer artenhut aguesta subvencion que mos permeterà dispausar d’un estauvi energetic deth 52%, en tot milhorar, ath madeish temps, er enlumenat de toti es pòbles deth municipi”, comente eth baile de vielha e Mijaran, Juan Antonio Serrano.
