Ager ena tarde s'amièc a tèrme era Assemblada Generau, a on se retifiquèc era candidatura de Maria Vergés entara sindicatura d'Aran per part dera militància d'Unitat d'Aran.
Vergés a manifestat que: “pendent tota era mia trajectòria en Unitat d’Aran è sajat tostemp de dar çò de melhor en favor d’un projècte comun, e ac è hèt damb eth compromís e leiautat que seguirè mantenguent damb aguesta tèrra e damb tota era sua gent, age neishut a on age neishut”, e higie que “Me presenti perqué voi contribuïr a crear valor ena nòsta societat e ac hèsqui dera man tanben d’aqueres persones que seran ath mèn costat en aguesta candidatura e qu’an demostrat tanben sobradaments era sua determinacion, capacitat e volontat de servir ath país e ara sua gent”.
Atau madeish, Vergés insistie en que: “actuaument, era d’UA ei unica opcion politica d’Aran damb un projècte clar e era solvéncia e capacitat de gestion de besonh, qu’a demostrat tot aguest temps, entà hèr front as rèptes qu’era Val d’Aran a per endauant com era adaptacion ath cambi climatic, era diversificacion economica, era retencion deth talent joen, er impuls dera innovacion, era superviuença dera nòsta lengua e cultura, eth modèl de desvolopament territoriau e er accès ar abitatge o era consolidacion deth nòste autogovèrn”.
Maria Vergés a 44 ans, ei enginhaira tecnica forestau e a estudis de post grau en gestion culturau pera UOC e d’Experta universitària en competéncies emocionaus enes organizacions pera UdL.
