Pendent era sua intervencion, eth president dera diputacion de Huesca, destacaue de Vergés que “ei ua hemna trabalhadora, tenaç e comprometuda, qu’a trabalhat conjuntament damb nosati pendent aguesti ans entà hèr front as rèptes compartidi des nòstes territòris en qüestion de desvolopament territoriau, mobilitat, sanitat e innovacion, entre d’auti ahèrs”.
Per un aute costat, Paco Boya, afirmaue que “Maria pren eth mèn relhèu dempús de 25 ans coma candidat a sindic, eth cargue mès important qu’un aranés o aranesa pòt ostentar, e pren aguest relhèu de manèra ordenada, damb molta estima per part de tot eth partit, sense tensions, de forma floïda e damb era volontat d’ajudar-la en aguest naua etapa” e higie: “ei era melhor candidata pr’amor que, dempús de totes es dificultats qu’auem trauessat aguesti darrèri 4 ans, coneish ben es rèptes as qu’a de hèr front eth territòri. A era capacitat de hèr front ad aguesti rèptes damb decision, feremesa e volontat de superar-les, metent tostemp as persones en centre des politiques e hènt a valer eth nòste país, era nòsta cultura e era nòsta identitat”.
Era candidata a sindica, Maria Vergés, manifestaue eth sòn arregraïment peth supòrt mostrat pes sòns companhs e companhes de partit e afirmaue: “consolidar er autogovèrn aranés ei çò que me posse a presentar-me coma candidata ara sindicatura, pr’amor qu’er autogovèrn ei era unica garantia qu’auem de poder compdar damb es recorsi de besonh entà amiar a tèrme accions que placen as persones en centre dera gestion publica”. Ena sua intervencion a reivindicat: “era forma de hèr politica d’UA dera tolerància e eth respècte estant, damb solvéncia e garantia de hèr qu’era Val d’Aran auance. Pr’amor qu’Unitat d’Aran ei era unica garantia d’arténher enes pròplèu eleccions qu’eth nòste país contunhe progressant e garantint era atencion as persones, eth desvolopament territoriau e artenhent majors còtes d’autogovèrn”.
