Aguesta setmana torne eth Salardú Country Ròck Festival, un des eveniments mès espectaculars a nivèu socioculturau que se pòden veir ena Val d'Aran ath long de tot er an. En aguest sens, eth hestau se harà des dies 24 ath 27 en un ambient espectacular e damb eth prètzhèt d’apropar-se ath maximom a un autentic panorama american.
Per çò qu'ei dera aufèrta de concèrts i aurà un totau de 8, en tot destacar es de Jason Blaine, Eric Ethridge e Kalsey Kulik, qu’aumplissen places e espacis aquiu a on van e se convertiràn enes grani atractius a nivèu internacionau pr'amor que serà eth prumèr viatge que tòquen en Euròpa. Dera madeisha manèra, i aurà 14 workshops que se portarà tanben as milhors coreografs dera scèna europèa, ua hèira restacada ar ambient american, ua zòna de restauracion e, coma nauetat, eth dimenge i aurà un espectacle de mariachis.
Es persones que residisquen en Aran auràn un gran benefici e ei que des dera organizacion deth Salardú Country Ròck Festival se bonificarà enquia un 50% a toti aqueri vesins que siguen empadronadi en territòri, ua grana oportunitat que cerque atrèir ath public locau e non sonque centrar-lo en internacionau.
Eth baile de Naut Aran, César Ruiz-Canela, destaque que “aguesta serà era 8au edicion deth Salardú Country Ròck Festival, sense compdar es dus ans de suspension pera crisi sanitària deth coronavirus e, era vertat ei que des der ajuntament èm fòrça contenti damb aguest eveniment pr'amor qu'apòrte ua gran vida ath municipi pendent aguesti dies, damb hotèls, bars e restaurants pleï e se respire un gran ambient e totauments diferent entà barrar eth mes d'agost”. Des deth consistòri se comunique a toti es visitants deth Country que s'a abilitat un gran parcatge ena zòna a on s'amie a tèrme era hèira de bestiar, ath cant der arriu Garona.
Ath Salardú Country Ròck Hestivau vieràn persones arribades des païsi nordics, Argentina, eth Brasil, es Estats Units o gent d'Australia. Era prevision ei que se pogue superar es 7000 persones pendent aguesti dies en eveniment, en tot auer coma referéncia es 12.000 persones que s'artenhec ans endarrèr.
