Er Ajuntament de Vielha e Mijaran inície eth projècte entà acabar de substituïr es canerades de fibrociment de Vielha. Aguesta intervencion s'emmarque laguens des accions deth Plan Nacionau entara eradicacion der amiant en Catalonha abans de 2028 coma fixe era Union Europèa.
Des deth consistòri i a un compromís fèrm entà eliminar definitiuament er amiant des canerades, en tot auer invertit ja mès de 500.000 € entà substituïr bona part deth fibrociment en gran part des carrèrs de toti es pòbles de Vielha e Mijaran.
"Er equip de govèrn de Vielha e Mijaran trabalhe des de hè diuèrses legislatures en suenh e mantenement deth servici der aigua correnta deth municipi, coma un des principaus èishi d'actuacion. En aguest sens, amiam a tèrme era reforma e mantenement de toti es depòsits d'aigua, mès tanben dera qualitat des canerades per a on circule era aigua. Auem hèt un cambi de bona part d'aguestes canerades de fibrociment de Vielha, e ara acabaram de substituïr es que manquen, entà poder garantir era qualitat deth servici d’aigües municipau”, comente eth baile de Vielha e Mijaran, Juan Antonio Serrano.
