Era glèisa de Santa Maria de Mijaran a acuelhut aué er acte de reconeishement deth Conselh Generau d'Aran as premiadi damb eth VII Prèmi Robèrt Lafont, Lissa Escala e Xavier Lamuela, pes sues trajectòries ena promocion der aranés. Er acte a estat presidit pera sindica d’Aran, Maria Vergés.
Era Generalitat de Catalunya autregèc eth passat mes de deseme, eth 7au Prèmi Robèrt Lafont, de manèra ex aequo, a Lissa Escala e a Xavier Lamuela Garcia e Lissa Escala, pes sues trajectòries coma referents ena normalizacion, defensa e promocion der aranés.
Lissa Escala a estat pionèra dera ràdio en aranés
Era jornalista Lissa Escala a estat pionèra dera ràdio en aranés, damb eth prumèr programa en aranés en Ràdio Aran, prètzhèt qu’a desvolopat ath long de mès de 30 ans damb programes coma Meddia Aranés, en Catalonha Informacion, contribusint a un modèl d’emplec e de prestigi sociau der aranés. Tanben destaque eth sòn compromis civic ena promocion dera lengua pròpria d’Aran er impuls d’iniciatives sociaus tant importantes entath territòri coma era Corsa Aran per sa Lengua, que reivindique era defensa e promocion der aranés.
Xavier Lamuela, defensor dera occitanitat der aranés
Eth lingüista e sociolingüista, doctorat en filologia romanica, Xavier Lamuela, a estat professor enes Universitats de Tolosa de Lengadòc, Girona, Autònoma de Barcelona, Lleida e Manchester, formèc part dera Comission que redactèc es Normes Ortografiques der Aranés en 1982, presidic eth Conselh dera Lengua Occitana (fondat en 1996) e actuauments ei membre deth Conselh Consultatiu der Aranés, creat peth Conselh Generau d’Aran en 2021 tar assessorament en matèria lingüistica dera maxima institucion aranesa. Lamuela ei autor d’un extens e rigorós trabalh academic damb transferéncia sociau, de diuèrsi estudis e libres sus era lengua, atau un coma defensor dera occitanitat der aranés mès tanben deth besonh qu’aguest sigue considerat coma primordiau e preferent ena politica lingüistica dera Generalitat coma lengua tanben oficiau deth territòri catalan, e qu’a d’èster dotada de toti es mieis de besonh tara sua perviuença.
