Pendent aguestes darrères setmanes s'an iniciat es òbres dera prumèra viuenda de loguèr assequible que formarà part deth parc d'abitatge sociau der Ajuntament de Naut Aran. Aguest hèt supause ua grana notícia pr'amor que se tracte dera prumèra pèira entà un nau futur en que, eth consistòri, promò de forma activa accions entà crear e dinamizar er abitatge assequible ena zòna.
En aguest cas, s'a adjudicat era reforma integrau dera antiga viuenda des mèstres plaçada ena localitat de Garòs e que compdarà damb 80 m². Era execucion dera òbra compde damb un pressupòst de 65,650,90€ e era prevision ei que pogue èster ua realitat abans d'aguest ostieu. Laguens des accions que s'amiaràn a tèrme per part dera enterpresa adjudicatària ei previst qu'aguest abitatge de loguèr sociau compde damb 1 banh, 2 abitacions, salon, codina, atau coma un petit espaci enta sauvar materiau.
Eth baile municipau, César Ruiz-Canela, afirme que “nosati èm un ajuntament de hèts, non de paraules. Quan nosati projectam quauquarren, sigue ena matèria que sigue, l'amiam a tèrme pr'amor qu'ei eth nòste déuer damb es nòsti ciutadans. E, ei per açò, qu’enes pròplèus mesi e ans haram realitat eth que serà eth parc d'abitatge assequible entàs vesins deth nòste municipi. Naut Aran trabalhe pes sòns vesins e aufrirà tostemp oportunitats de futur entà que toti eri poguen prosperar dera milhor forma possible”.
Er Ajuntament de Naut Aran non forme part deth plan d’abitatge d'Aran promoigut peth Conselh Generau d’Aran pr'amor qu'es abitatges que promò e promoirà son finançadi dirèctaments peth consistòri e vò que vagen dirigidi sonque as sòns vesins. Dera madeisha manèra, se vò destacar qu'era realitat economica e residenciau de Naut Aran ei completaments diferenta ara dera rèsta deth territòri.
Ad aguest prumèr abitatge de Garòs se li somaràn un aute en Tredòs, sies en Salardú e d’auti futurs projèctes.
