EDUCACION

Er Ajuntament de Naut Aran ampliarà era escòla Ruda de Salardú pendent era pròplèu primauera

Aguest projècte d'ampliament dera escòla Ruda de Salardú se trape actuauments en periòde d'exposicion publica
Escola Ruda Naut Aran
photo_camera Er Ajuntament de Naut Aran ampliarà era escòla Ruda de Salardú / nautaran.org

Er Ajuntament de Naut Aran ampliarà era escòla Ruda de Salardú pendent era pròplèu primauera en un projècte que contemplèc des deth mes d'abriu de 2021. En aguest sens, cau rebrembar qu'eth consistòri inicièc es tramits entà ampliar era superfícia dera escòla Ruda de Salardú pr’amor der increment d'escolans qu’auec eth centre pendent aqueth cors en plea crisi deth coronavirus.

Açò se produsic perqué es matriculacions aumentèren en un 44% en tot passar de 52 a 75 escolans, en tot auer de hèr un sobreesforç logistic entà acuelher-les e distribuïr-les dera forma mès eficienta entre es diferentes classes disponibles.

Escola Ruda Naut Aran
Er Ajuntament de Naut Aran ampliarà era escòla Ruda de Salardú / nautaran.org

En aguest sens, er ajuntament a volut realizar un gran ampliament entà que tant es pairs e mairs, professors e escolans deth centre poguen gaudir dera educacion damb era major qualitat possibla. Desafortunadament, e per ahèrs legislatius deth Departament d'Educacion dera Generalitat de Catalonha, s’a auut de redefinir eth projècte entà que pogue adaptar-se ara totalitat ara norma actuau en contra des principaus idèes deth consistòri.

Actuauments, eth pressupòst ascendirie a un totau de 517.000 èuros en ua accion que s'inclodirie era creacion d'un ascensor, accèssi independenti entà totes es classes, dues aules mès e dus passadissi de 2,5-3 mètres entà amiar a tèrme activitats poliesportiues. Dera madeisha forma, en aguesta naua part der equipament educacional s'installarie ua caudèra de pelets.

Eth baile de Naut Aran, César Ruiz-Canela, destaque que “ei un projècte fòrça ambiciós que credem qu'agradarà tant as familhes dera poblacion de Salardú, coma as professors qu’actuauments an de besonh auer mès espaci entà amiar a tèrme es sues classes. Volíem hèr un espaci fòrça mès gran entàs nòsti petiti e mèstres, mès eth Departament non mos a permetut amiar a tèrme bères accions”.

Aguest projècte d'ampliament dera escòla Ruda de Salardú se trape actuauments en periòde d'exposicion publica e, se non i a cap suggeriment o apellacion sus aguest ahèr, se licitarà damb ua prevision d'inici d'òbres entre es mesi d'abriu e mai d'aguest madeish an

Més a Val d'Aran