EQUIPAMENTS

Demore desèrta era adjudicacion deth projècte de desumidificacion des piscines deth Palai de Gèu

Er Ajuntament de Vielha e Mijaran cèrque empreses entà que poguen realizar era intervencion damb eth pressupòst actuau abantes dera primauera.
Pisicina Vielha
photo_camera Piscines deth Palai de Gèu de Vielha e Mijaran / vielha-mijaran.org

Eth projècte entà desumidificar era unitat des piscines deth Palai de Gèu a demorat desèrt. D’aguesta manèra, provisionaument aguesta intervencion non s’a podut adjudicar e, per tant, demorarà un temps mès sense poder solventar es problèmes existenti en aguesti espacis.

Des der Ajuntament de Vielha e Mijaran se trabalhe ena cèrca d’empreses que poguen amiar a tèrme aguestes òbres jos eth pressupòst existent. Mès, enes darrèri tempsi, era sua activitat economica s’a vist afectada pera pujada des prètzi des materiaus.

S’aguesta cèrca non balhe resultats, des deth consistòri s’aurà de tornar a modificar era prepausa economica e tornar a daurir eth procès de licitacion, en tot endarrerir era possibla execucion des prètzhèts.

Pisicina Vielha
Piscines deth Palai de Gèu de Vielha e Mijaran / vielha-mijaran.org

Aguesta intervencion, qu’ei fòrça de besonh, a coma objectiu solventar es problèmes existenti de hè diuèrsi ans ençà ena condensacion e filtracions d’aigua, atau coma es manques en isolament deth barrament que patíssen aguesti espacis en Palai de Gèu.

Atau madeish, se garantirà qu’es milhores complissen damb era normatiua vigenta, que permet arténher es optimes condicions de salubritat, qualitat der aire e benestar termic. Ath delà, an de generar un important estauvi economic autant en emplec dera bastissa coma enes recorsi emplegadi en sòn mantenement.

Eth consistòri ja solventèc aguesti madeishi problèmes en airau dera pista de gèu, en tot milhorar era qualitat d’aguest espaci. De manèra que damb era execucion d’aguesta dusau intervencion, se finalizarie damb aguesti problèmes en conjunt de prumèra planta deth Palai de Gèu.

“Dempús d’auer demorat desèrta era adjudicacion d’aguestes milhores, cercam possibles empreses que poguen amiar a tèrme era sua execucion. Entenem qu’es prètzi des materiaus dera construccion an aumentat, e se non trapam cap candidat, calerà tornar a reformular era licitacion”, comente eth dusau tinent d’alcalde e còsso d’espòrts de Vielha e Mijaran, Alberto López López. E ahig que “ei fòrça urgenta aguesta intervencion, pr’amor qu’es problèmes de condensacion e filtracions d’aigua ja hè temps que son presenti, e s’an de solventar entà acabar de condicionar era installacion”.

 

09/02/2023