Era sindica d’Aran, Maria Vergés, s’a adreçat per carta ath president dera Generalitat de Catalunya, Pere Aragonès, entà hèr-li arribar era demana formau de qu’er executiu catalan age en compde e respècte es institucions araneses, era volentat des aranesi e eth marc competenciau e de desvolopament institucionau dera Val d’Aran, reconeishut ena Lei de Regim Especiau dera Val d’Aran, en tot eth procès de desvolopament der “Acòrd de Claretat” qu’era Generalitat vò iniciar a trauès d’un grop d’expèrts.
Pendent era amassada que mantengueren era sindica d’Aran e eth president dera Generalitat eth passat 19 d’abriu en Parlament de Catalunya, era sindica dejà li auancèc era intencion de hèr-li arribar aguesta demana pera via formau, en tot insitir en qu’Aran, coma territòri autonòm, a d’auer era sua pròpria agenda politica e es aranesi e araneses son es qu’auàn de decidir, quin e com serà eth sòn futur se’n bèth moment i a un cambi ena configuracion der Estat.
Atau madeish, ena sua carta, era sindica d’Aran soslinhe era importància capdau qu’a eth respècte as leis e ar ordenament juridic vigent, coma garantia de mantenement des drets des pòbles e dera ciutadania.
