Eth passat diuendres s’amièc a tèrme era amassada de replantejament des òbres dera glèisa de Sant Joan d’Arties, damb er equip tecnic e era empresa adjudicatària d’aguesta intervencion. Ei previst qu’es òbres d’execucion deth projècte d’adequacion coma equipament museografic dera glèisa de Sant Joan comencen enes pròplèu dies.
Aguesta glèisa, bastida entre es sègles XIII e XIV, constituís un des principaus exponents der estil gotic ena Val d’Aran. Foncionèc coma dusau parròquia d’Arties enquia principis deth sège XX quan, pr’amor deth mau estat en que se trapaue, deishèc d’emplegar-se. Eth mau estat s’agreugèc pendent es decades posteriores enquia qu’enes ans 70 s’assolidèc era bastissa e, ans dempús gràcies ara cession per part deth Bisbat d’Urgell, s’incorporèc ar hilat d’equipaments deth Musèu dera Val d’Aran coma sala d’exposicions temporaus.
Dempús de mès de tres decades de foncionament coma sala d’exposicions, ère de besonh renauir es installacions e es sistèmes museografics entà qu’esdevenguen mès eficients e sostenibles, atau coma mès accessibles entà tot tipe de publics.
Atau madeish, ei previst crear un nau espaci entara exposicion permanenta deth Musèu deth Temps, en tot recuperar es dus nivèus de tribunes deth còr, qu’antigament auien existit as pès dera nau.
Un aute des objectius d’aguest projècte ei dotar d’ua major versatilitat er espaci dera planta baisha entà poder lotjar, ath delà d’exposicions temporaus, d’aute tipe d’eveniments culturaus coma pòden èster concèrts, conferéncies e jornades.
