Lengua Viua ven d'inaugurar aué, dimèrcles 2 de junhsèga, eth panèu de Montgarri que hè part deth projècte “Es Peades de Mossen Jusèp Condò Sambeat”, e qu'ei plaçat a pòqui mètres dera glèisa dera Mair de Diu de Montgarri.
Justaments, s'a volut profitar eth romieuatge qu'aué s'a celebrat en aguest endret entà hèr era inauguracion oficiau d'aguest bocin dera òbra deth mès illustre escrivan aranés, coma ère Mossen Jusèp Condò Sambeat, e qu'a compdat damb era collaboracion der Ajuntament de Naut Aran, a qui, d'ençà de Lengua Viua, volem arregraïr, especiauments, era sua implicacion entà plaçar aguest panèu que simbolize un fragment dera sua òbra magistrau.
Eth tèxte deth murau ditz atau: “E lèu en Montgarri arribi dempús d'ua grana baishada e aquiu hèsqui ua parada entà encomanar-me a Diu. Pensant qu'ei eth darrèr pòble dera Val d'Aran que tròbi me semble eth mès gran opròbi auer-me'n d'anar d'aquiu”.
Dies, endarrèr, eth 29 de junh, en tot coïncidir damb era hèsta de Sant Père, en Les s'inaugurèc eth prumèr panèu d'aguest projècte, qu'ei plaçat, provisionauments, ath cant dera glèisa de Sant Joan. Eth definitiu demorarà en Musèu Casa deth Haro, a compdar dera pròplèu tardor, un viatge inaugurat eth projècte museïstic d'aguesta bastissa.
Eth tèxte d'aguest panèu s'i pòt liéger: “Eth Haro lèu enlumene tot eth torn coma un solei e es halhes se'n van a préner dera lum que tant se hèr a veir e li baren es aubades coma hilhes per tot eth torn coma hilhes qu'eth a engendrades damb eth huec deth sòn amor”.
Era presidenta de Lengua Viua, Imma Caubet soslinhe que “voi arregraïr as Ajuntaments de Naut Aran e de Les pera sua collaboracion damb nosati entà poder desvolopar aguest itinerari qu'includís part dera òbra poetica de Mossen Jusèp Condò Sambeat, pr'amor que, gràcies a da eri, seguim en tot possar er usatge e er emplec der aranés, damb aguesti fragments dera sua poesia que tanben poderà conéisher gent de dehòra dera Val d'Aran, damb es còdi QR disponibles en 4 idiòmes mès”.
Er objectiu de Lengua Viua ei que cada an se pogue amiar a tèrme eth plaçament de naui panèus en d'auti pòbles dera Val d'Aran, en tot sajar de qu'en futur toti agen un panèu damb un bocin dera òbra de Mossen Condò Sambeat. Tredòs serà eth següent pòble en auer un nau panèu e, se tot va ben, Bossòst tanben l'aurie d'auer abans de 2026.
Lengua Viua creèc er itinerari ”Es Peades de Mossèn Jusèp Condò Sambeat” tà evidenciar, a trauès dera sua poesia, era estima des aranesi pera lengua pròpria d'Aran, er aranés, ath temps que la da a conéisher as que visiten eth territòri. Ad aguesti dus naui pannèus s’i ahig eth dejà plaçat enes cubèrts der Ajuntament de Vielha e Mijaran, er an 2019, damb motiu deth centenari dera mòrt der escrivan e qu’ei era sua crida ara preservacion der aranés qu’eth collectiu Lengua Viua tanben hèr sua.
