MÈDI NATURAU

Installades es casetes toristiques d’informacion e contròtle d’accès enes accèssi tath mèdi naturau d’Aran

Eth Conselh Generau d’Aran, a trabalhat ena installacion de 7 casetes a on se plaçarà eth personau d’ostiu contractat tà balhar informacion as toristes, controtlar eth nombre de places des parcatges e susvelhar es resèrves enes principaus ribères dera Val d’Aran
Casetes val d'aran
photo_camera Personau d’ostiu contractat tà balhar informacion as toristes /CGA

Eth Departament de Torisme, amassa damb eth Departament de Territòri, Paisatge e Gestion Ambientau deth Conselh Generau d’Aran, an trabalhat ena installacion de 7 casetes a on se plaçarà eth personau d’ostiu contractat tà balhar informacion as toristes, controtlar eth nombre de places des parcatges e susvelhar es resèrves enes principaus ribères dera Val d’Aran

A compdar d’aué ja son operatives es sèt casetes toristiques enes accèssi tà:

  • Ribèra d’Aiguamòg – Colomèrs
  • Artiga de Lin – Uelhs deth Joeu
  • Ribèra de Varradòs – Saut deth Pish
  • Mines Victòria – Bassa d’Arres
  • Bausen – Bòsc de Carlac
  • Ribèra de Valarties
  • Bassa d’Oles – Varicauva

Ath cant de cada ua d’aguestes casetes i a ua barrèra qu’eth personau temporau d’ostiu s’encuede de baishar tà que non i poguen accedir mès veïculs e non se collapsen aguesti endrets quan eth parcatge a arribat ara sua capacitat maxima. Mès ad aqueri veïculs que non poguen passar, eth personau des casetes les facilitarà informacion a temps reau dera afluéncia entàs auti accèssi gràcies ara web “Aparcaran”, creada pera empresa aranesa Maladeta Studio. D’aguesta manèra, es visitants poiràn conéisher d’auti pairatges d’Aran sense auer de patir es conseqüéncies des aglomeracions, damb era promocion de d’auti endrets deth territòri que son mens visitadi.

Pla obert d'una de les casetes instal·lades en l'accés a un espai natural de la Val d'Aran. (Vertical)

A despiet d’aguestes barrères fisiques, a toti es aranesi e araneses qu’agen er adesiu de “Veïcul autorizat” se les deisharà passar, e en cas des ciutadans aranesi/es qu’encara non agen aguest adesiu, lo pòden sollicitar en ajuntament corresponent en tot demanar cita per auança.

Ua auta des foncions importantes deth personau plaçat enes casetes ei aufrir supòrt toristic en tot indicar coma accedir tàs lòcs que demanen es toristes e quini atractius toristics i a enes ribères. Aguest personau tanben pòrte un contròtle des resèrves, tà qu’aqueri qu’agen reservat d’auança ena madeisha web “Aparcaran”,  agen prioritat de pas.

Pla obert d'una de les casetes instal·lades en l'accés a un espai natural de la Val d'Aran. (Vertical)

Aguest personau d’ostiu tanben remassarà donades des visitants qu’arriben enes ribères, que se somaràn as donades recuelhudes pera web “Aparcaran” e que s’utilizaràn un viatge acabada era tempsada tà hèr un estudi de mobilitat deth nòste territòri.

En paraules deth conselhèr Juan Antonio Serrano: “Era crompa e installacion d’aguestes casetes ajude a dar visibilitat e autoritat ath personau d’ostiu, qu’a de trabalhar entà controtlar era accesibilitat e dar informacion de prumèra man as visitants. Tot açò evitarà es aglomeracions e permeterà ua atencion mès personalizada entà mielhorar era experiéncia des nòsti toristes”.

Ath delà, ja s’estúdie eth futur usatge que se li poirà dar ad aguestes casetes ath long der an, pr’amor que s’an aquerit gràcies ath Plan de Sostenibilitat artenhut per airau de Torisme, e se pòden desplaçar damb facilitat per tot eth territòri.