MUSÈUS

Eth Musèu dera Val d’Aran commemòre es sòns 40 ans d’istòria

Era Tor deth Generau Martinhon actuau sedença deth MdVA, acuelh er acte institucionau de celebracion d’aguesta efemerida, que s’anarà commemorant ath long d’aguest 2024
Musèu dera Val d'Aran
photo_camera Eth Musèu dera Val d’Aran commemòre es sòns 40 ans d’istòria / @conselharan

Era bastissa deth Musèu dera Val d’Aran a acuelhut er acte institucionau de celebracion deth 40 aniversari dera sua creacion.

Er acte oficiau s’a encetat damb era benvenguda e presentacion des accions e logotrip des 40 ans deth Musèu a cargue dera directora deth Musèu, Carla del Valle.  An intervengut tanben es membres dera Fondacion Musèu Etnologic dera Val d’Aran, Arturo Calbetó e Angelina Cases, qu’an explicat eth papèr d’aguesta entitat ena genèsi deth Musèu e Josep M. Trullén, prumèr director der MdVA qu’a hèt un repàs de tot eth trabalh ath  torn dera creacion deth Musèu. Es parlaments s’an barrat damb era sindica d’Aran, Maria Vergés qu’a destacat “eth valuós trabalh qu’amièren a tèrme totes aqueres persones que, damb umilitat e compromís, héren possible poder sauvar era memòria deth país”. Tot seguit, bohada de candèles e autrejament d’un present as assistents. Ara fin, s’a projectat un vidèo commemoratiu des 40 ans.

Rebrembar qu’eth Musèu dera Val d’Aran s’inaugurèc eth 4 de Mai de 1984 e representèc ua hita istorica ena vida culturau deth país.

Ei eth prumèr viatge que se hè un aumenatge ad aguesta institucion entà méter en valor que siguec un musèu pionèr e referent entà d’auti musèus de Catalonha e de tot er Estat Espanhòu.

Quan se pensèc crear un musèu, enes ans 70, coincidic damb era recuperacion dera identitat dempús de deishar endarrèr era dictadura mès tanben damb es prumères accions de normalizacion lingüistica.

Era societat, era classa politica e era Glèisa aranesa volien un musèu, e siguèc pera generositat deth pintor de Barcelona, Miquel Farré Albagès, que se formalizèren es gestions e se crompec era Tor deth Generau Martinhon, actuau sedença.

Aué, jornada de pòrtes dubèrtes entà poder-lo visitar.

Més a Val d'Aran