16.01.2022 |
Viure als Pirineus

INSTITUCIONS

Eth Conselh Generau d’Aran apròve eth pressupòst tà 2022 de 35,9 MEUR

Es partides mès destacades se centren ena atencion as persones, en tot aumentar era dotacion tar airau de sanitat e atencion sociau
Pressupost Aran 2022 bis
Eth Conselh Generau d’Aran apròve eth sòn pressupòst tà 2022 /CGA
Eth Conselh Generau d’Aran apròve eth pressupòst tà 2022 de 35,9 MEUR

Aguest dijaus s’a celebrat eth plen extraordinari deth Conselh Generau d’Aran en qué s’an aprobat es compdes dera maxima institucion tà 2022.

Eth pressupòst previst tar an que ven, qu’ei de 35.903.284€, contemple un aument important per çò que hè as partides de sanitat e atencion sociau, de mès d’un milion d’euros, destinat a, per un costat, hèr front ara gestion dera COVID-19, e per aute implementar d’auti naui servicis e melhorar es actuaus. En aguest sens, eth govèrn deth Conselh Generau d’Aran a previst méter en foncionament un Servici d’Atencion Domicilària (SAD), coma plan pilòt, entà balhar un recors de supòrt, dirigit as persones que, per rason d’edat, malautia o discapacitat, an limitada era sua autonomia.

Atau madeish, eth pressupòst contemple tanben ua dotacion entà seguir implementant eth projècte de gestion forestau, qu’a d’impulsar er aprofitament sostenible des bòsqui, en tot hèr-les mès resilients ath cambi climatic e as incèndis de sisaua generacion e en apostar pera bioeconomia e era generacion d’emplec.

Aguesti compdes tanben contemplen es diuèrses inversions previstes en Plan de Sostenibilitat Toristica iniciat enguan, damb ua partida de 475.000€, atau coma ua naua collaboracion damb Baqueira Beret entara promocion toristica a trauès des oficines qu’era empresa a plaçades en Madrid.

D’un aute costat, se mantien es partides de supòrt as esportistes aranesi atau coma a eveniments esportius que s’amien a tèrme ena Val d’Aran. Per çò que hè ath supòrt ara ramaderia, eth Conselh Generau d’Aran manten es partides destinades as indemnizacions per bestiar despareishut, as associacions agropecuàries atau coma per çò que hè ara agrupacion de ramats pendent er ostiu.

En encastre dera innovacion, es pressupòsti deth Conselh Generau d’Aran apòsten peth supòrt as persones emprenedores e er impuls de projèctes damb base tecnologica, coma ei actuaument eth projècte der hilat LORA en collaboracion damb eth sector ramadèr.

Eth pressupòst a estat aprovat damb es vòts a favor deth grup d’Unitat d’Aran e era abstencion deth grup de Convergéncia Aranesa.

Pressupost Aran 2022

Entara sindica d’Aran, Maria Vergés “aguesti pressupòsti pretenen hèr front as rèptes qu’a era Val d’Aran en aguesti moments, coma era gestion dera pandemia, mès tanben era diversificacion dera economia e era retencion deth talent” e higie que “tot e qu’encara non auem respòsta dera Generalitat sus eth compliment per part sua der acòrd de finançament, çò que mos a condicionat fòrça ara ora de barrar aguesti compdes e non mos a permetut inclodir-i tot çò qu’ei de besonh, auem hèt un esfòrç entà qu’aguesti compdes servisquen entà, ena mesura des nòstes possibilitats, melhorar era qualitat de vida dera ciutadania aranesa e començar a consolidar ara Val d’Aran coma referent en diuèrsi àmbits”.

En un aute orde d’ahèrs, pendent eth plen a prenut possession deth sòn cargue coma conselhèr generau, eth senhor Andreu Cortés, en substitucion deth sr, Francés Boya, e qu’amiarà a tèrme foncions de coordinacion entre es ajuntaments aranesi e eth Conselh Generau.

" "
Eth Conselh Generau d’Aran apròve eth pressupòst tà 2022 de 35,9 MEUR
Comentarios