A conseqüencia dera importanta pluja queiguda des de delànet, e pendent aguest maitin, i a agut un esbauçament de tèrres e pèires ena pista d'accès ath parçan de Varradòs. Per aguest motiu, demorarà barrat eth sòn transit des dera EMD d'Arròs e Vila a tot tipe de veïcles.
Pendent era jornada d'aguest deluns, Vielha e Mijaran se trape jos un perilh anaut d'inundacions e lauegi a conseqüéncia des fòrtes pluges iniciades delànet e que seguissen pendent eth dia (Situacion de Prealèrta INUNCAT).
Era poblacion de Vielha a recebut 55 l/m2 e era prevision ei arribar ath torn des 100 l/m2 pera tarde. En desparièrs endrets deth municipi i agut esbauçaments de carretères e diuèrses inundacions.
Per aguest motiu, se demane ara gent extremar es precaucions pendent es pròplèu ores, pr'amor que pòt seguir auent-i desbordaments des arrius e barrancs, atau coma lauegi pera acumulacion d'aigua enes montanhes, que pòt afectar as carretères e pistes forestaus, atau coma viuendes e locaus.
Pendent tot eth dia, eth baile de Vielha e Mijaran, Juan Antonio Serrano, eth còsso d'òbres e servicios, Jacint Cuny e era brigada municipau, visiten es zònes afectades, en tot avaluar es damatges e previer es actuacions avientes de proteccion ara ciutadania.
