Eth collectiu Lengua Viua, creat en 1994 tara possa der usatge sociau der aranés, inaugure es dus prumèri pannèus damb bocins de poesia der itinerari ”Es Peades de Mossèn Jusèp Condó Sambeat”. Eth prumèr serà plaçat en Les, iniciaument, de sòrta simbolica, enes totèms informatius ara entrada dera Plaça deth Haro. Aquiu se descorbirà, amassa damb eth sòn Ajuntament, eth dissabte 29 de junh (entàs 18:45) damb motiu dera hèsta dera Quilha deth Haro. Mès endeuant, se inaugurarà eth pannèu definitiu en futur “Musèu deth Haro” que s’i bastís, e que se preve que daurirà es sues pòrtes era pròplèu tardor. En bocin de poesia escuelhut peth collectiu, Mossen Condò hè referéncia, precisament, ad aguesta hèsta.
Eth dia 2 de junhsèga (entàs 11:00) serà eth torn tara inauguracion, amassa damb er Ajuntament de Naut Aran, deth pannèu plaçat hè quauque temps dejà en Montgarri a arraïtz dera presentacion dera iniciatiua per part de Lengua Viua damb motiu deth sòn 30au aniversari en junhsèga der an 2024. Ena estròfa de poesia trigada, Condò Sambeat hè referéncia ad aguest endret tant emblematic.
Es pannèus s’an complementat damb un QR explicatiu revirat a 4 lengües: castelhan, catalan, francés e anglés.
Lengua Viua cree er itinerari ”Es Peades de Mossèn Jusèp Condó Sambeat” tà evidenciar, a trauès dera sua poesia, era estima des aranesi pera lengua pròpria d'Aran, er aranés, ath temps que la da a conéisher as que visiten eth territòri. Ad aguesti dus naui pannèus s’i ahig eth dejà plaçat enes cubèrts der Ajuntament de Vielha e Mijaran, er an 2019, damb motiu deth centenari dera mòrt der escrivan e qu’ei era sua crida ara preservacion der aranés qu’eth collectiu Lengua Viua tanben hèr sua. Era iniciatiua se vò hèr a arribar, an a an, a toti e cadun des pòbles d'Aran.
