Era Val d’Aran ven de barrar era sason toristica d’iuèrn damb un pònt de Setmana Santa fòrça bon a on es donades d’aucupacion ostalèra an estat deth 80’4% (er an passat sigueren de 63%, en 2019 d’un 79’3% e en 2018 d’un 78%).
Aguesta sason d’iuèrn 2021/2022 a auut ues donades d’aucupacion jamès vistes enquiara e especiaument bon a estat eth mes de hereuèr, damb ua mieja deth 77,4%, fòrça superior ara des ans 2020 (68,6%), 2019 (73%) e 2018 (69%).
“Aguestes donades mos ajuden a plaçar ara Val d’Aran coma ua destinacion toristica de referéncia”, afirmaue eth conselhèr d’Economia, Torisme e Promocion Economica, Juan Antonio Serrano e higie que “er esfòrç e trabalh deth sector privat, amassa damb eth supòrt deth Conselh Generau d’Aran per çò que hè ara promocion an hèt possible que barrem ua tempsada de rècord”.
Pendent aguesta Setmana Santa, es bones temperatures an permetut as persones qu’an visitat eth nòste territòri non sonque gaudir dera nhèu e er esquí, senon tanben deth ciclisme e es activitats de montanha. Aguesta diversitat de clients a dat fòrça as sectors dera restauracion e eth comèrç aranesi.
Era sindica d’Aran, Maria Vergés, manifestaue que: “aguesta extraordinària tempsada d’iuèrn a estat possible gràcies ar esfòrç e trabalh der empresariat toristic aranés” e a volut tanben “arregraïr eth prètzhèt des professionaus dera maxima institucion aranesa enes airaus de torisme, sanitat, gestion de residus, miei ambient e emergéncies”.
