MOBILITAT

Era sindica d’Aran torne a sollicitar limitar eth pas de camions ena N-230 pendent era sason d’iuèrn

Autant er an passat coma en 2019, eth govèrn deth Conselh Generau dejà artenhec aguesta limitacion pendent es dimenjades entre era localitat de Benabarre (Òsca) e era termièra francesa dera Val d’Aran, ua mesura damb fòrça bona acuelhuda per part des usatgèrs/es dera via
Camio-N-230-Vielha
photo_camera Aran torne a sollicitar limitar eth pas de camions ena N-230 pendent era sason d’iuèrn / CGA

Era sindica d’Aran, Maria Vergés, a sollicitat per carta ath subdirector generau de Gestion dera Mobilitat e Tecnologia dera Dirección General de Tráfico (DGT), Jorge Ordás, e ara responsable deth Servici Territoriau de Transit de Lleida, Maria Trilla, era limitacion deth pas de camions ena N-230 pendent era sason d’iuèrn entà garantir era seguretat des usatgèrs e usatgères dera via.

“Era carretèra N-230 se caracterize per èster, pendent es darrèri ans, ua via damb nauta sinistralitat pr’amor qu’era nauta preséncia de veïculs articuladi e es condicions orografiques e climatologiques la hèn especiaument perilhosa”, afirmaue era sindica d’Aran, en tot híger que: “dejà er an passat e, prèviaments, en  2019 sollicitèrem ath Ministèri de Foment que s’estudièssen mesures qu’ajudèssen a palliar aguest risc e, en aguest sens, s’aprovèc era restriccion deth pas de veïculs articuladi de mercaderies pendent era tempsada d’esquí, qu’ei quan aguesta via compde damb ua major afloéncia”.

Er an passat e en 2019 dejà s’artenhec limitar eth pas des camions de diuendres a dimenge entre es localitats de Benabarre (Òsca) e era termièra francesa dera Val d’Aran, ua mesura fòrça ben acuelhuda en nòste territòri e qu’eth govèrn deth Conselh Generau d’Aran inste a repréner enguan.

comentaris