AUVIATGE SACRE ARANÉS

Era prumèra gran exposicion sus Art Sacre aranés arribe en Sant Joan d’Arties

Era exposicion ARAN ME FECIT se presente damb eth sostítol “Des mèstres constructors ara recèrca der auviatge sacre”

Església-Betren jpg 2
photo_camera Una image de la glèisa de Betren/Conselh Generau d'Aran

A compdar deth dia 1 de deseme se poderà veir en Sant Joan d’Arties era prumèra gran exposicion sus er auviatge sacre aranés damb eth títol d'ARAN ME FECIT ena quau, per prumèr còp, s’i exposaràn era planimetria, fotografies e documentacion sus 42 glèises e capèles araneses.

Era exposicion que s‘inaugurarà eth pròplèu diuendres 30 de noveme tas 19.00 ores en Sant Joan d’Arties ei organizat peth Conselh Generau d’Aran, amassa damb er Avescat d’Urgelh, eth Musèu dera Val d’Aran, era Escòla Superiora d’Arquitectura dera Universitat Rovira e Virgili e era Escòla Superiora d’Arquitectura dera Universitat Internacionau de Catalonha.

Era importància deth trabalh qu'arrecuelh peth prumèr còp era dimension der Art Sacre dera Val d’Aran se completarà mès tà deuant damb era edicion d’un libre en qué se mostrarà er estat actuau de tot aguest auviatge damb articles de referéncia sus cadun des aspèctes deth madeish.

 Eth libre serà publicat en lengua aranesa, mès damb era volontat de hèr arribar es sòns contenguts a especialistes e persones interessades per auviatge dera Val d’Aran de mès enlà der encastre territoriau pròpri. Ei per açò qu'eth Conselh Generau d’Aran a encargat era traduccion des articles tanben ath catalan, castelhan, francés e anglés.

Era edicion deth libre compdarà damb es tèxtes introductoris der arquevesque d’Urgelh e coprincep d’Andòrra, monsenhor Joan Enric Vives Sicília e deth sindic d’Aran, Carlos Barrera. Era edicion compdarà ath delà damb es articles des membres deth comitat editoriau confegit exprèssaments entàra òbra amassa damb es aportacions de destacadi especialistes mondiaus en Art Sacre coma Serge Brunet, dera Universitat de Montpelhièr; Manuel Castiñeiras, dera Universitat Autonòma de Barcelona; e Howard Bradley, dera Universitat de Cambridge, entre d’auti.

Eth comitè editoriau l’intègren Jèp de Montoya, assessor de Cultura deth Conselh Generau d’Aran, Elisa Ros Barbosa, responsabla der Airau d'Auviatge Culturau deth Conselh Generau d’Aran, Mn. Josep Mª Mauri Prior, vicari generau der Avescat d’Urgelh, Josep Lluís Ginovart, catedratic dera Escòla Superiora d’Arquitectura dera Universitat Internacionau de Catalonha e Agustí Costa, professor dera Escòla Superiora d’Arquitectura dera Universitat Rovira e Virgili. Aguest Comitè a estat er encargat de convidar a collaborar en projècte as diferenti especialistes e tanben s’aucupe de survelhar es contenguts, maquetacion e dessenh dera publicacion.

Eth libre includirà un mapa damb planimetria e fotografies damb detalhs des glèises dera Val d’Aran.

Era exposicion ARAN ME FECIT se poderà veir des der 1 de deseme enquiath 27 d’abriu de 2019 de deluns a dissabte de 17.00 a 20.00 ores en Sant Joan d’Arties.