Eth plen der Ajuntament de Naut Aran a aprovat damb es vòts a favor de Convergéncia Aranesa e es abstencions d'Unitat d'Aran e d'Aran Amassa era modificacion pressupostària de 1.762.000 ena que se plantègen accions tanplan importantes que milhoraràn era vida des vesins deth municipi.
En aguest sens, çò de mès destacat ei qu'era equipa de govèrn prebotge encara mès era viuenda sociau ena zòna pr'amor que se destinaràn 100.000 èuros entà acabar ua viuenda en Tredòs que se destinarà a loguèr sociau e tanben se reabilitarà er antic pis dera escòla de Garòs per un valor de 60.000 èuros, un espaci que tanben se destinarà a loguèr sociau.
Eth baile deth consistòri, César Ruiz-Canela, explique que "portam tota era legislatura amiant a tèrme accions entà promòir era viuenda sociau. Era creacion des viuendes dera plaça dera Pica de Salardú per valor de 700.000 èuros e deth futur macrocomplèx de Naut Aran qu'aurà un còst aproximat de 9 milions d'èuros, era bossa d'abitatge o eth cambi de licéncies de usatge comerciau entà ua licéncia de viuenda de caractèr sociau. Ara actuaram tanben entà milhorar aguest aspècte en Tredòs e en Garòs e pensi qu'èm er unic municipi que trabalham de vertat de forma dirècta e activa entà solucionar aguesta grèu problematica".
Ath delà, entre d'autes qüestions tanben se cambiarà er enlumenat deth carrèr carretèra de Garòs e es fanaus dera zòna per valor de 32.000 èuros; s'urbanizarà part deth carrèr Major de Salardú per valor de 175.000 èuros a compdar de seteme; se pavimentaràn carrèrs en parçan de Plaus d'Arties per valor de 200.000 èuros; s'enlumenarà eth camin que va de Salardú a Tredòs damb ua partida de 50.000 èuros; s'harà eth trepadèr dera perimetrau de Baqueira damb un pressupòst de 80.000 èuros o se finançaràn projèctes entàs EMD's de Bagergue (trauèssa de Beret per 150.000 èuros), Arties e Garòs (300.000 èuros en carrèr major d'Arties); calefactar era zòna de Pujo per 125.000 èuros entre d'auti o 150.000 èuros entara EMD de Gessa entath carrèr Barranc e carrèr Sant Martí.
Eth baile, Ruiz-Canela, afirme que "aguesta modificacion pressupostària ei fòrça destacada e pensam que toti es vesins i demoren representadi. Dejà auem planificadi d'auti projèctes en poblacions coma per exemple Unha entà poder auançar totaument en toti es airaus en nòste municipi. Naut Aran ei ua referéncia entà tota era Val d'Aran e seguiram trabalhant en aguesta linha".
En d'auti ahèrs, eth plen der Ajuntament de Naut Aran a aprovat per unanimitat es ajuts entara associacion Amics deth Nepal e damnificadi peth terratrèm de Turquia e Siria o era adesion ara seccion de municipis d'aigües mineraus e termaus d'Espanha.
