Eth Congrès a aprovat aguest dijaus era reforma deth reglament dera cramba pr'amor qu'eth catalan, er aranés, eth basc eth galhec pogatz èster utilizadi a tota era activitat parlamentària. Era reforma a obtengut 180 vòts en favor (PSOE, Somar, ERC, Amassa, PNB, Bildu, BNG e CC) e 170 en contra (PP, Vox e UPN). Prèviaments, era cramba a refusat era esmena ara totalitat qu'auie enregistrat Vox e tanben es tres esmenes parciaus qu'auie presentat eth PP. Pendent lo debat PP e Vox an criticat çò que considèren un "espectacle illegau" e ua "cession ar independentisme", deth temps qu'era rèsta de formacions an defenut çò que considèren un pas istoric entà normalizar era realitat d'un estat "plurau e plurilingüe", en paraules deth deputat deth PSC Marc Lamuà.
Ua notícia excellenta entara Val d’Aran
Eth passat mes d’agost, era sindica d’Aran, Maria Vergés, s’adreçaue per carta ara presidenta deth Congrès, Francina Armengol, entà demanar qu’er aranés podesse èster tanben emplegat en emicicle. Aguesta demana recebec ua responsa afirmativa, que culmine aué damb era aprobacion dera modificacion d’aguest Reglament.
“Aguesta ei ua notícia excellenta entara Val d’Aran e ua mòstra de reconeishement importanta tara nòsta lengua pròpria” asseguraue era sindica d’Aran, en tot híger: “ei un prumèr pas fòrça important en trabalh qu’amiam a tèrme entà arténher eth reconeishement dera singularitat d’Aran e deth nòste autogovèrn per part der Estat Espanhòu”.
