Eth Plen deth Conselh Generau d’Aran a aprovat aguest diuendres, damb es vòts a favor d’UA e era abstencion de CA, ua modificacion de credit deth pressupòst generau dera maxima institucion aranesa ena que destaque, principaument, ua partida de 600.000€ destinada ath projècte d’ampliacion e remodelacion der Espitau Val d’Aran.
“En mes de març d’enguan artenhíem eth compromís dera Generalitat entà hèr realitat era ampliacion e remodelacion deth nòste Espitau que, per prumèr còp en 38 ans, aurà ua melhora plan importanta entà renauir e ampliar airaus qu’an demorat obsolèti” afirmaue era sindica d’Aran, Maria Vergés, en tot híger que: “ei previst poder iniciar aguest projècte enes pròplèu setmanes”.
Er acòrd prevé era execucion des òbres entre 2023 e 2028, en tot èster dividides, en prumèra instància, en tres fases: ua fasa iniciau d’adequacion dera plaça entre er Espitau e era residéncia Sant Antòni, ua prumèra fasa de bastiment d’un nau edifici ath cant dera residéncia a on se plaçarien es consultes d’atencion primària e especializada e ua darrèra fasa entà remodelar es espacis d’urgéncies e diagnostic pera imatge.
Aguesta modificacion de crèdit contemple tanben ua partida entà ampliar eth servici de transpòrt qu’inclodirà ua linha de transpòrt nocturn entàs trabalhadors, en tot dar responsa atau a ua demana qu’eth sector dera ostalaria a hèt arribar ath govèrn aranés.
En aguest Plen s’a amiat a tèrme tanben era prenuda de possession dera senhora Àngela Cases Andreu coma conselhèra deth govèrn deth Conselh Generau d’Aran, dempús qu’en darrèr Plen, celebrat eth passat mes de junh, se presentèsse era renóncia ath cargue de conselhèr per part deth senhor Juan Antonio Serrano, escuelhut entà aucupar eth cargue de vicepresident tresau dera Deputacion de Lleida.
Atau madeish, s’a amiat a tèrme era aprobacion iniciau dera declaracion e catalogacion coma Bens Culturaus d’Interès Locau (BCIL) era Glèisa de Santa Maria de Cap d’Aran de Tredòs e era Glèisa parroquiau de Sant Joan de Les.
En aguest sens, s’a aprovat eth reglament dera Comission Assessora d’Auviatge damb es vòts a favor des conselhèrs/es deth grop d’Unitat d’Aran (UA) e dus conselhèrs deth grop de Convergéncia Aranesa (CA). Es auti dus conselhèrs de CA s’an abstengut en aguest punt.
