Era EMD de Bagergue a recuperat ua tradicion istorica coma ei era processon des dera glèisa de Sant Félix de Bagergue enquiara ermita de Santa Margalida, plaçada a pògui quilomètres, en tot coïncidir damb eth 60au aniversari dera reconstruccion d'aguest petit temple religiós.
Era capèla, qu’originaument siguec lheuada en sègle XIX, se cremèc ena epòca dera Guèrra Civiu Espanhòla en tot deishar as vesins d'aguesta poblacion sense un des sòns maximoms exponents arquitectonics. Ans mès tard, en an 1962, un grop de vesins, de manèra volentària, decidic tornar a bastir era ermita de Santa Margalida entà poder tornar-la dignificar e aufrir un nau espaci de devocion.
En aguest madeish periòde, se hèc ua procession commemoratiua damb ua Vèrge que siguec aufrida ara EMD per part d'un òme que hège extraccion de jançana ena madeisha poblacion de Bagergue. Ara, 60 ans mès tard per prumèr viatge en tot aguest temps, se torne a recuperar aguesta tradicion en tot commemorar justaments era data deth lheuament dera ermita de Santa Margalida que siguec erigida pes pròpris vesins dera zòna.
Eth baile dera EMD de Bagergue, Marc Tarrau, destaque que “avaloram fòrça positivaments aguesta recuperacion istorica deth nòste auviatge culturau de hè sies decènnis. Ara estudiaram se repetir aguesta accion pendent es pròplèus ans damb es vesins deth pòble, mès èm fòrça erosi qu'age pogut vier tanta gent ad aguest acte.”
Er eveniment a estat un succès categoric pr’amor qu'an anat ath torn de 500 persones provenentes de toti es punts dera Val d'Aran, atau coma d’auti visitants deth territòri. Era Vèrge a estat portada tant per vesies e vesins dera poblacion e s'a rememorat era scèna de hè 60 ans damb ua fotografia des que sigueren presenti en an 1962.
Er acte s'a barrat damb era tradicionau missa deth romiatge, balhs hestius e era benediccion deth pan, vin e hormatge de Tarrau dera pròpria hormatgeria de Bagergue.
