COOPERACION TRANSTERMIÈRA

Aran e era Communauté de Communes Pyrénées Haut-Garonnaises reclamen era dubertura deth pas deth Portilhon

Aguest maitin s’a celebrat er acte commemoratiu deth tractat de Lies e Patzeries
Aran reunió transfronterera
photo_camera Acte de commemoracion des 508 ans deth tractat de Lies e Patzeries en Fos /CGA

Aguest dijòus a auut lòc er acte de commemoracion des 508 ans deth tractat de Lies e Patzeries en Fos, ajornat enguan pr’amor dera pandèmia, e qu’a estat presidit pera sindica d’Aran, Maria Vergés, e eth président dera Communauté de Communes Pyrénées Haut-Garonnaises, Alain Puente, e qu’a compdat tanben damb era participacion des conselhèrs de Governacion, Amador Marqués, alcalde tanben de Bossòst, e de Territòri, Paisatge e Gestion Ambientau, Francés Bruna, eth conseiller départamental e president de Haute-Garonne Tourisme, Didier Coujives, eth director generau deth Comité Départamental du Tourisme de Haute-Garonne, Jean Micoud, e era sous-préfète de Saint-Gaudens, Marie-Paule Demiguel, entre d’auti.

Un acte commemoratiu dedicat ara cooperacion transtermièra, a on eth govèrn aranés e es representants dera Communauté de Communes Pyrénées Haut Garonnaises an reclamat conjuntament eth besonh dera redubertura dera termièra deth Portilhon, barrada deth mes de gèr ençà de forma unilaterau per part der Estat Francés.

En aguest sens, era sindica d’Aran tornaue a reclamar: “deth Conselh Generau d’Aran ençà entenem que, en marc actuau dera Union Europèa e sustot laguens der espaci Schengen, aguest barrament dera termièra ei insostenible e grèu entath dret ara mobilitat e era liure circulacion des ciutadans membres dera UE” e higie que: “eth Portilhon ei un pas fòrça important entàs abitants d’Aran e deth parçan de Comminges, e especiaument entàs poblacions de Bossòst e Luchon, qu’an de besonh aguesta via entà complementar servicis comerciaus, sanitaris, esportius o educatius, entre d’auti, e ei urgent recuperar era sua dinamica de cooperacion e vesiatge”. Atau madeish a manifestat eth besonh que “era burocràcia non passe peth dessús des drets des persones, e poder mantier er esperit de cooperacion territoriau deth tractat de Lies e Patzeries” .

Pendent aguesta jornada, s’a hèt tanben un repàs as diuèrsi projèctes compartits entre eth Conselh Generau d’Aran e era Communauté de communes Pyrénées Haut Garonnaises, coma ei eth cas deth camin ciclable TransGarona, que connectarà era Val d’Aran damb eth centre sud de França, o eth Camin de Santiago Aran-Pirenèus, que se presentèc de forma oficiau dejà aguest ostiu e que pòrte as pelegrins de Sant Bertrand de Comminges, en tot trauessar era Val d’Aran, era Alta Ribagorça e Òsca, enquiath Camin de Santiago catalan.