Eth Palai d’Espòrts de Vielha acuelhie er acte d’autrejament deth certificat oficiau dera Val d’Aran com a Resèrva dera Biosfèra pera UNESCO. Era sindica d’Aran, Maria Vergés recebie de mans deh secretari generau tath Rèpte Demografic, Francés Boya, era certificacion oficiau d’aguest nomenament per part der Estat, en representacion deth Ministeri de Transicion Ecologica e Repte Demografic.
Eth Conselh Generau d’Aran a trabalhat ath long de quate ans en aguesta candidatura, impulsada en 2020, pendent eth govèrn deth sindic Francés Boya, damb eth programa de participacion ciutadana ARAN 2030, e que siguec en prumèr lòc acceptada peth Ministèri de Transicion Ecologica e Rèpte Demografic deth govèrn der Estat e, posteriorament, enviada tath comitat dera UNESCO que l’aprovèc definitivaments.
Era sindica d’Aran, Maria Vergés, manifestaue “aguesta distincion per part dera UNESCO ei un hèt istoric que mos refèrme en compromís que coma govèrn mantiem damb Aran e era sua gent” e higie que “èster Resèrva dera Biosfèra dera UNESCO ei tanben un important reconeishement ara linha d’accion e ath projècte de país qu’eth govèrn deth Conselh Generau d’Aran amie a tèrme, e reafirme qu’èm en bon camin entà hèr d’Aran un territòri damb futur tara sua ciutadania, e tanben tà liderar en Pirenèu ua estratègia conjunta de desvolopament sostenible”.
Aguesta ei ua hita istorica entà Aran que non s’auie artenhut jamès, que supause un reconeishement internacionau e que mos place coma territòri referent entar impuls de bones practiques en desvolopament territoriau, ambientau e socioeconomic.
Era celebracion compdaue damb era interpretacion des còlhes de dances d’Aran en representacion dera cultura aranesa, un des pilars dera candidatura que presentèc era Val d’Aran ena UNESCO, un acte dubèrt ath public a on i participauen ua bona part deth teishit sociau e economic deth país.
Era declaracion dera Val d’Aran com a Resèrva dera Biosfèra se hec en Agadir (Marròc) eth passat mes de junhsèga, pendent era 36au edicion deth Conselh Internacionau de Coordinacion dera UNESCO tath programa “Òme e biosfèra”, a on i assistic era sindica d’Aran damb ua representacion dera equipa tecnica qu’a trabalhat ena candidatura, e tanben representants deth Ministèri de Transicion Ecologica e Rèpte Demografic responsables deth MAB en Espanha.
