Unitat d’Aran amiec a tèrme pendent era net d’ager eth sòn acte d’inici de campanha, un acte que compdèc damb era participacion dera secretària generau d’UA e candidata tara sindicatura d’Aran, Maria Vergés, eth president deth partit e secretari generau entath Rèpte Demografic, Francés Boya, atau coma des candidats as alcaldies municipaus e es caps de lista des terçons entàs eleccions tath Conselh Generau d’Aran.
En aguest acte, se presentèc eth lèma de campanha: “+ Unitat x Aran”, un lèma qu’englòbe eth projècte deth partit: "trabalhar entà arténder majors oportunitats, drets e autonomia entà ua Val d'Aran qu'auance cap a un futur a on era màxima prioritat deth sòn govèrn ei eth benèstar des persones que i demoren".
“Unitat d’Aran presente ues candidatures liderades per hemnes e òmes comprometudi damb eth sòn país e era sua gent, damb un projècte centrat ena atencion as persones, eth desvolopament territoriau e era consolidacion dera nòsta autonomia politica que mos permete governar dera proximitat ençà”, manifestaue era candidata a sindica, Maria Vergés, en tot híger que: “demanam as aranesi e araneses era sua confiança en Unitat d’Aran, un partit qu’a demostrat era sua capacitat en ua legislatura coma era qu’ara barram, a on mos a calut hèr front a ua pandèmia e diuèrses crisis que mos an dificultat poder desvolopar es nòstes prepauses damb normalitat. Totun, auem artenhut granes melhores entara Val d’Aran, en tot demostrar qu’èm capables de desvolopar un projècte de futur que mos permete contunhar plaçant as persones en centre des politiques e des accions”.
