CURSES DE MUNTANYA

Presenten eth Val d’Aran by UTMB®, era naua pròva de trail-running en còr des Pirenèus

Era prumèra edicion se celebrarà en junhsèga de 2020. Es dates exactes e eth format se presentaràn en agost pendent eth UTMB® Mont-Blanc 2019

Ultra Trail Aran 2
photo_camera La Val d'Aran de 2020 formará parte del circuito "by UTMB"

Val d’Aran by UTMB®, eth nau eveniment internacionau de trail running que se celebrarà enes Pirenèus espanhòus, a estat presentat en Conselh Generau d’Aran e se desvoloparà coma ua collaboracion a long termini entre UTMB® International e InAran Sports, damb era collaboracion deth Conselh Generau d’Aran.

Es organizadors an confirmat qu’era carrèra, qu’ena sua prumèra edicion se disputarà en junhsèga de 2020, harà part des eveniments internacionaus etiquetats UTMB®, en tot integrar a compdar de 2020 eth nau circuit internacionau de ultra-endurance trail running neishut dera associacion recentaments signada entre UTMB® e eth Ultra-Trail® World Tour, qu’eth son calendari serà presentat aguest estiu.

Ultra Trail 3

Er acte inaugurau aurà lòc ath long de diuèrses distàncies en espectacular scenari dera Val d’Aran, en plen còr des Pirenèus espanhòus. Es detalhs complèts deth recorregut e dera inscripcion s’anonciaràn en agost de 2019, pendent era setmana deth UTMB® Mont-Blanc.

Era Val d’Aran, “Era Esséncia des Pirenèus”, ei ua val orientada entar Atlantic plaçat en còr des Pirenèus catalans, damb tucs qu’artenhen es 3.000 m, un climat unic e un fòrt auviatge culturau. Mès deth 90% deth territòri dera Val ei natura pura, que grana part se tròbe en Parc Nacionau “Aigüestòrtes e Estany de Sant Maurici”.

Val D’Aran signifique “Val des Vals” donques qu’aufrís tot çò que se pòt demanar damb força possibilitats entà gaudir des sues montanhes.

“Era Val d’Aran aufrirà eth son arreconeishut acuèlh entà arrecéber as corredors e es sues familhes. Aguesta serà ua oportunitat unica entà mostrar eth nòste territòri, un territòri que pòt èster percebut petit en extension mès que represente es montanhes mès granes. Er eveniment serà ua descubèrta deth territòri entà fòrça persones e entara Val d’Aran supausarà ua naua escasença e un pas important entà enriquir era sua aufèrta en estiu. Enes darrèri ans, era Val d’Aran a acuelhut eveniments esportius internacionaus e de classa mondiau, en tot includir era Copa deth Mon d’Esquí de Montanha e Snowboard, e era arribada e gessuda deth Tour de France”, didec Carlos Barrera, sindic d’Aran.

“Mos shaute de portar ara Val d’Aran un eveniment tan prestigiós e coneishut e desiram dar era benvenguda as corredors espanhòus, francesi e internacionaus enes nòstes impressionantes montanhes. Eth lòc a un potenciau incresible entà èster ua destinación unica en carrères de trail running e trabalharam damb era equipa UTMB® entà aufrir as participaires ua experiéncia unica”, ahigec Xavier Pocino Moga, CEO de InAran Sports.

Govern Aran 2

Eth Trail running s’a convertit en un espòrt fòrça popular, damb un gran nombre de carrères que se celèbren cada an en país, corredors de tot eth mon que vòlen en Espanha entà gaudir der espòrt e ua grana representacion de corredors espanhòus en eveniment UTMB® Mont-Blanc, çò qu’ei ua clara indicacion deth tipe d’acuèlh qu’arreceberà eth Val d’Aran by UTMB®, e que harà part deth son gran succès.

“Era mèrca UTMB® signifique fòrça mès qu’ua carrèra. Toti es eveniments apiejadi peth UTMB® s’organizen damb es mès nauti estandards de qualitat, en tot aufrir carrères desafiantes enes montanhes e ua experiéncia extraordinària entàs corredors e entàs aficionadi en destinacions emblematiques”, didec Catherine Poletti, directora deth UTMB® Mont-Blanc.

“Aguest nau eveniment en còr des Pirenèus mos permet enriquir era aufèrta deth UTMB® en tèrmes de diversificacion deth terren, en tot presentar un nau e impressionant recorregut de montanha, desparièr ar aupin, damb ua fòrta caracterizacion, “, ahigec Michel Poletti, codirector deth UTMB®.

Val D’Aran by UTMB® serà eth 5au eveniment dera familha UTMB®, en tot junher-se a d’autes destinacions emblematiques e toristiques especiuaments atractiues entàs trail runners que desiren explorar eth mon: UTMB® Mont-Blanc, Gaoligong by UTMB®, Oman by UTMB® e Ushuaia by UTMB®.

Coma en toti es auti eveniments “by UTMB®”, es finishers deth Val d’Aran by UTMB® poderàn, des dera prumèra edicion der eveniment, apletar es “Running Stones” e obtier ua inscripcion dirècta entara carrèra UTMB® Mont-Blanc dera sua eleccion sense auer de passar peth tiratge.

“Èm contenti d’ahíger eth Val d’Aran by UTMB® ath nòste calendari, un eveniment que mostrarà en tot eth mon eth costat mès coneishut dera sarrada des Pirenèus e qu’aportarà un valor ahijut en mon deth trail running. Aguest eveniment ei ena linha damb er objectiu generau deth UTMB® de desvolopar eveniments prestigiosi e dauridi a toti en toti es continents. Benvengudi a bòrd Val d’Aran” a ahijut Rémi Duchemin, CEO deth UTMB International®.