Er Ajuntament de Naut Aran anóncie que se tramite era modificacion des Nòrmes Subsidiàries de Planejament entara creacion d'abitatge plurifamiliar de loguèr sociau regulat en municipi gràcies ar acòrd confirmat pera Comission d'Urbanisme dera Val d'Aran.
Aguesta regulacion preten era creacion de mès abitatge sociau per part deth consistòri que consistirie en hèt qu'es locaus plaçadi enes baishi damb licéncia urbanistica d'edificacion podessen reconvertir e obtier ua licéncia d'abitatge sociau de loguèr segontes eth regim generau establit entàs abitatges sociaus pera Generalitat de Catalonha, entà poder aufrir era possibilitat que gesquen en mercat de loguèr en aguestes condicions. Sus aguest ahèr se destaque que, un viatge modificat er usatge a abitatge sociau de loguèr, non poderà revertir aguest usatge ara iniciau de locau, damb er objectiu d'evitar especulacion immobiliària. Cau rebrembar qu'eth plen der Ajuntament de Naut Aran aprovèc aguesta mesura impulsada pera equipa de govèrn eth passat 17 de seteme der an 2020.
Eth baile de Naut Aran, César Ruiz-Canela, destaque que “un des nòsti objectius pendent aguesti darrèri ans a estat era creacion d'abitatge sociau. Aguesta mesura ei un exemple pr’amor que sajam de reconvertir locaus en planta baisha que non agen usatge o que volguen cambià'c entà acuélher a familhes a un prètz sociau. Portam fòrça temps en tot trabalhar en accions especifiques entad aguesti collectius coma tanben serie era imminenta creacion des pisi de loguèr sociau ena zòna dera plaça dera Pica de Salardú o eth projècte d'equipaments dotacionaus e publics en centre d'aguesta madeisha poblacion que tanben aportarie dera orde d'uns 30 abitatges assistenciaus as nòsti vesins”.
Es naui abitatges d'Emparament Public sus es antics locaus auràn de dar compliment as condicions minimes d'abitabilitat que regule eth Decrèt 141/2012 sus es condicions minimes d'abitabilitat des abitatges e era cèdula d'abitabilitat. Es condicions des loguèrs seràn determinades pera regulacion generau der abitatge sociau.
Eth termini de presentacion de sollicituds serà enquiath diuendres 2 de deseme. Es interessadi pòden presentar era sua sollicitud mejançant ua instància generica ara pagina web der Ajuntament de Naut Aran e tanben pòden contactar damb es oficines deth pròpri consistòri en orari de 08.00 a 14.00 de deluns a diuendres.
