Coma ei d’abituda en aguestes dates, es vesins dera poblacion de Salardú celèbren era sua hèsta major, en aunor a Santa Creu, pendent aguestes jornades deth 2 ath 5 de mai. Era comission de hèstes d'aguesta poblacion a preparat ua sèria d'activitats entà totes es edats damb eth prètzhèt que i age ua grana participacion non sonque des abitants d'aguesta localitat, senon dera rèsta de Naut Aran e de d’auti vesins dera Val d'Aran que s'apròpen as que son es prumères hèstes majors der an.
Es actes comencen aguest madeish 2 de mai damb un playback infantil e un partit de fotbòl, toti dus tàs 17:30, entà seguir damb un concors de trueites e pastissons pera tarde e un bingo e balh de net. Eth 3 de mai serà eth dia der acte centrau des hèstes de Santa Creu pr’amor que s'amie a tèrme peth maitin, a compdar des 10:30, era tradicionau amassada de crotzes e era missa en aunor a Santa Creu. Entà acabar aguesta jornada culturau, s'aufrís des der Ajuntament de Naut Aran un aperitiu a toti es vesins. Pera tarde son previstes activitats socioesportives coma un circuit de mòtos, concors de diboish rapid o un concèrt de rumba. Ena net se gaudirà d'un concèrt de Celtas Cortos coma un des actes principaus dera hèsta.
Pendent eth 4 de mai s'a fixat un dia fòrça apropriat entara poblacion mès joena damb ua recerca deth tresaur, tir ara diana, concors de quilhes, pellicules infantiles o eth tir ath plat. Fin finau, eth 5 de mai, i aurà mès eveniments tradicionaus culturaus com son eth ‘passavila’ o es ‘aubades’. Es actes finalizaràn aquera madeisha net damb un correfocs.
Eth baile municipau, César Ruiz-Canela, destaque que “Santa Creu ei tostemp un des eveniments der an a nivèu sociau e culturau en nòste municipi. Èm fòrça contenti de poder gaudir un an mès damb toti es nòsti vesins d'uns dies fòrça especiaus e que genèren ua grana unitat entre toti. Demoram ua grana participacion e, des d’aciu, voi arregraïr ara Comission de Hèstes eth sòn gran trabalh tot aguest temps e eth que haràn pendent aguesti dies. Son fonamentaus pr'amor que tot ges endauant d'ua forma perfècta”.
