Eth Plen der Ajuntament de Naut Aran a aprovat iniciaument aguest maitin damb es vòts a favor dera equipa de govèrn de Convergéncia Aranesa e es abstencions d’Unitat d’Aran e d’Aran Amassa eth pressupòst mès naut de tota era istòria damb un totau de 9.450.000 € que supause un creishement d’un 6% respècte est an passat.
Entre es ahèrs mès destacadi d’aguest increment se reflèxen es inversions en abitatge a on s’includissen es òbres entath pis de loguèrassequible en Tredòs (115.000€), es quate abitatges e nau places de parcatge ena Plaça dera Pica de Salardú (1.200.000€), qu’en mes de gèr se licitarie e s’iniciarien es òbres en mes de mai de 2025 o eth contracte deth projècte dera òbra deth Centre Civic e Sociau de Salardú (1.015.000€) qu’eth 12 de deseme se saberà era enterpresa encuedada d’amiar eth projècte executiu damb un inici d’òbres previst entà mai de 2026.
En airau d’actuacions en pòbles, se renauirà eth consultòri d’Arties (260.000€, es quaus 250.000€ son per subvencion), se caperarà era pista de padel d’Arties (111.000€), apraiar eth carrèr XX d’Unha (subvencion de 180.000€) o d’autes coma er apraiment deth pati dera escòla Ruda de Salardú (50.000€), calefactar eth camin de Pujò (125.000€), finalizar era zòna de Plaus d’Arties (310.000€) o acabar eth trepadèr ena perimeutrau de Baqueira (80.000€). Eth canon de Baqueira crubat d’est an passat ascendic as 2.300.000 € e era prevision d’enguan s’a plaçat enes 2.000.000 €.
En çò que tanh a actuacions en energies renauïbles, un des projèctes mès ambicioso deth consistòri ei eth dera creacion deth ‘District Heating’, era centrau de calor en Salardú damb un pressupòst de 1.569.000€ e que començaràn es òbres en mes de hereuèr entà plaçar es receptors de calor en diuèrsi equipaments publics coma eth poliesportiu era glèisa Sant Andrèu de Salardú. En mes d’abriu, damb era arribada dera primauera, s’harà era òbra centrau dera nau d’astèra e era sala de caudères.
Eth baile de Naut Aran, César Ruiz-Canela, afirme que “ei ua legislatura molt ambiciosa entà nosati. Projectam moltes actuacions tanplan importantes en fòrça matèries que beneficiaràn a toti es nòsti vesins deth municipi. Abitatge, espòrts, cultura, accion sociau, naues energies renauïbles, tot ei contemplat laguens d’aguest pressupòst istoricquepotenciaràNaut Aran moltmès comaun destin deprumèr nivèu.”
Ath delà, s’a aprovat per unanimitat era modificacion dera ordenança fiscau reguladora der impòst sus bens immòbles entà introdusir era bonificacion ena installacion de sistèmes entath profitament termic o electric dera energia solara en aguesti bens deth municipi.
