Aguesta tarde a auut lòc er acte de presentacion der alcalde de Vielha e Mijaran, Juan Antonio Serrano, coma candidat tara reeleccion enes comicis deth 28 de mai, un acte qu’a compdat damb era preséncia der actuau equip de govèrn der Ajuntament, dera sindica d’Aran e Secretària Generau d’UA, Maria Vergés, deth secretari generau tath Rèpte Demografic e president d’UA, Paco Boya, e des companhs e companhes deth partit, amics e familha deth candidat.
Pendent era sua intervencion, Serrano a metut en valor toti es projèctes amiadi a tèrme pendent es darrères legislatures, especiaument es darrèri quate ans: “non cau desbrembar que venguem de trauessar ua pandèmia que mos a metut fòrça dificils es causes, totun, pensi qu’auem amiat a tèrme fòrça accions centrades en suenh des persones e er impuls deth nòste municipi coma era inversion en servisis basics coma er hilat d’aigües, era creacion de naui equipaments esportius (skatepark, pista poesportiva exteriora), melhores ena accessibilitat damb era reforma de trepadèrs, era reforma integrau deth Casau deth Jubilat, eca. Atau coma projèctes que se inciaràn enes pròplèus setmanes coma era reforma deth pati dera Escòla Garona damb era creacion d’un camp de futbòl, era urbanizacion dera Plaça Comets en tot crear un nau espaci de lèsser, o era adequacion e melhora deth Passeg fluviau enquia era mòla de Betren”. En aguest sens, higie: “mos manquen fòrça projèctes per desvolopar, entà arténher qu’es nòsti vesins e vesies agen eth municipi que desiren e meriten”.
Er alcalde a volut arregraïr “eth compromís e trabalh de tot er equip de govèrn, pensi qu’auem artenhut crear un bon grop de persones involucrades, damb un interès per trabalhar conjuntament peth ben dera nòsta ciutadania”, atau madeish, a arregraït “eth trabalh qu’amien a tèrme toti es trabalhadors e trabalhadores der Ajuntament, pr’amor que, sense eri e eres, non serie possible desvolopar es projèctes de besonh entà bastir un municipi melhor”.
