Era sindica d’Aran, Maria Vergés, a recebut aguest maitin ara conselhèra de Drets Sociaus e Inclusion pera Generalitat de Catalunya, Mónica Martínez, ena sua prumèra visita institucionau des de qu’ostente eth cargue, damb qui a tractat diuèrsi ahèrs relacionadi damb era atencion sociau ena Val d’Aran que son primordiaus entath govèrn d’Aran.
Ena amassada mantenguda entre era Sindica e era Conselhèra, i an assistit tanben Raúl Moreno, secretari Generau de Drets Sociaus e Inclosion, Josep Lluís Piqué, coordinador territoriau deth DSI en Naut Pirenèu e Aran e es responsables des Servicis Assistenciaus Integrats d’Aran.
Era sindica d’Aran a destacat que: “Consolidar es competéncies en matèria sociau ei ua des prioritats deth govèrn aranés tad aguesta legislatura que mos a de perméter ampliar era cartèra de servicis que ven dera man dera ampliacion der acòrd de traspassi”, Maria Vergés a remercat que: “damb aguesta ampliacion de traspassi artenheram, d’acòrd damb era normativa vigenta, volem arténher amiar a tèrme eth procès complèt de declaracions de discapacitat e dependéncia, çò que significarie mens temps de demora tàs usatgèrs e usatgères”.
