Aguest dijaus, 2 de noveme, a auut lòc, en Palai dera Generalitat en Barcelona, era amassada dera Comission Bilaterau entre eth govèrn dera Generalitat e eth Conselh Generau d’Aran, qu’a estat presidida pera sindica d’Aran, Maria Vergés, e era conselhèra de Presidéncia, Laura Vilagrà, e ena qu’an prenut part tanben eth conselhèr de Governacion, Innovacion e Torisme, Amador Marqués, eth conselhèr de Territòri, Paisatge e Cambi climatic, Francés Bruna, eth conselhèr de Gestion Ambientau e Transicion Energetica, Oriol Sala, eth conselhèr d’Abitatge e Agenda Urbana, Andreu Cortés, eth conselhèr d’Espòrts, Javier Cavero, e era cap dera oposicion Rosa Maria Salgueiro, atau coma d’auti nauti cargues dera Generalitat.
“Dempús de vint ans, auem artenhut a daurir eth traspàs en matèria d’espòrts, un airau en quau pendent aguest temps eth Conselh Generau non a auut es recorsi ne es competéncies de besonh entà desvolopar politiques e accions que mos permeten gestionar un airau de tanta importància en nòste territòri”, manifestaue era sindica d’Aran.
Un aute des acòrds artenhudi a estat era ampliacion de competéncies e de mieis economics en matèria d’atencion sociau en 421.950 €, que: “permeteràn ath govèrn deth Conselh Generau d’Aran ampliar servicis vitaus entath territòri coma es politiques locaus de joenessa, eth servici d’atencion en entorn domiciliari, eth servici d’intervencion socioeducativa entà mainatges e joeni en situacion de risc, o ajudes d’urgéncia sociau, entre d’auti” afirmaue era sindica d’Aran e higie que “aguest ei eth prumèr pas entà, atau e coma convenguérem damb eth conselhèr de Drets Sociaus dera Generalitat, arténher eth barrament deth traspàs en matèria sociau pendent eth prumèr trimesadèr der an que ven, entà qu’eth Conselh Generau d’Aran pogue amiar a tèrme, entre d’autes qüestions, es declaracions de dependéncia o discapacitat”.
Atau madeish, s’a acordat era prorogacion der acòrd de finançament entre era Generalitat e eth Conselh Generau d’Aran entar exercici de 2024, entà, pendent aguest an, trabalhar ena aprovacion d’un modèl de finançament que balhe estabilitat ara maxima institucion aranesa.
