Eth Plen deth Conselh Generau d’Aran a aprovat iniciaument aué, damb es vòts a favor d’Unitat d’Aran (UA) e era abstencion de Convergéncia Aranesa (CA), eth pressupòst dera maxima institucion aranesa entà 2024, de 44.057.000 €.
“Deth govèrn d’Aran ençà auem plantejat uns pressupòsti que mos permeten amiar a tèrme en 2024 ua inversion importanta ena atencion as persones e eth desvolopament deth territòri”, afirmaue era sindica d’Aran, Maria Vergés, que higie: “totun, aguest pressupòst includís un increment deth 5,5% der Acòrd de Finançament, ei a díder 1,8 milions d’euròs, que demorarà condicionat ara aprobacion des pressupòsti dera Generalitat”.
Eth Plen deth Conselh Generau d’Aran a aprovat iniciaument aué, damb es vòts a favor d’UA e era abstencion de CA, eth pressupòst dera maxima institucion aranesa, qu’enguan ei de 44.057.000 €, mès demore condicionat ara aprobacion des pressupòsti dera Generalitat de Catalunya, des que ne depenen 1’8 millions d’€
Entre es inversions previstes, en cau destacar era remodelacion dera codina der Espitau Val d’Aran damb un impòrt de 485.000 €, que tanben compdarà damb eth supòrt dera Deputacion de Lleida, atau coma eth renauiment der equipament tecnologic der Espitau per valor de 270.000 €.
I aurà tanben ua apòsta importanta pes inversions coma era de Castèth Leon damb 160.000 €, eth museografic deth Musèu deth Temps damb 145.000 €, eth museografic deth Centre d’Interpretacion des Hèstes deth Huec damb 120.000 € o es 75.000 € que se dedicaràn a amiar a tèrme diferentes melhores enes Musèus dera Val d’Aran (Musèu dera Lan, Mina Victòria o Ecomusèu Çò de Joanchiquet, entre d’auti).
Tanben i aurà un increment deth 250% ena partida de ramaderia entàs ajudes ath bestiar non retornat qu’arribe enquia 50.000 €, ua melhora enes convènis damb es associacions agropequàries e se destinaràn 150.000 € ara melhora deth Refugi de Saboredo, projècte qu’ei dejà adjudicat.
En equipaments, se destinaràn 72.000 € ena melhora e adequacion der edifici d’òbres publiques, destinat ar impuls dera innovacion e retencion deth talent, 50.000 € tà bastir, amassa damb er Ajuntament de Naut Aran, ua Oficina de Torisme en Salardú e 12.000 € en ua caseta d’informacion en Arties.
Atau madeish, s’incremente en un 12% eth pressupòst entà ADDA damb mès de 17.000 € e tanben s’incremente en 7.000 € era partida destinada a Caritas ena Val d’Aran.
