Era activitat se desvoloparà deth 29 de març ath 6 d’abriu de 2026, en orari de 11.00 h a 19.00 h, damb accès liure. Era glèisa demorarà dubèrta ath public pendent aguest periòde e era visita serà liura.
Aguesta iniciativa permeterà as visitants gaudir d’un des elements patrimoniaus mès emblemàtics deth pòble, damb era possibilitat d’accedir ath campanau e contemplar ues vistes privilegiades. Cau rebrembar qu’en an 2023 se realizèc era reforma e melhora des accèsi ath campanau, hèt que n’a permetut era adequacion entara visita publica.
Des d’aguest punt elevat, se pòt apreciar ua perspectiva excepcionau deth conjunt deth nuclèu e deth sòn entorn naturau, des deth pòble mès naut dera Val d’Aran, Bagergue.
Paralelament, era EMD de Bagergue informe que lèu s’iniciaràn naui trabalhs de melhora ena glèisa, damb er objectiu de contunhar auançant ena conservacion e adequacion des espacis patrimoniaus. En concret, ei prevista era melhora dera escala d’accès ath còr, entà reforçar era seguretat des usatgèrs que visiten eth campanau; atau coma era rehabilitacion dera sagristia, damb actuacions entà resòler problèmes d’umiditats e era degradacion des paraments interiors.
Tanben ei prevista era substitucion des hièstres der autar major, incorporant perfileria metallica entà melhorar era eficiéncia e substituir es elements de husta actuaus, afectadi peth pas deth temps.
Aguestes actuacions se realizaràn gràcies a ua subvencion der Institut d’Estudis Ilerdencs (IEI), complementada damb hons pròpis dera EMD de Bagergue.
Damb aguestes accions, era EMD de Bagergue reafirme eth sòn compromís damb era conservacion, melhora e difusion deth patrimòni culturau, garantint ath madeish temps era seguretat e qualitat dera visita.
