Era estrea dera dusau temporada dera sèrie en aranés ‘Èm çò qu’èm’, é impulsada peth govèrn deth Conselh Generau d’Aran dera man de Lleida TV a trauès dera productora audiovisuau Kionalia Project.
“Deth Conselh Generau d’Aran ençà èm plan satisfets d’anonciar era estrea d’aguesta dusau tempsada, ua apòsta creativa entà impulsar era promocion e normalizacion dera nòsta lengua pròpria pr’amor que, a despièch des dificultats damb es que mos trapam entà poder desplegar ua politica lingüistica eficaç entà lutar contra era desaparicion der aranés, consideram indispensable contunhar trabalhant e cercant naues formules entà apropar era lengua as naues generacions”, afirmaue era sindica d’Aran, Maria Vergés.
Un còp mès, aguest producte audiovisuau torne a apostar pera ficcion e er umor entà prebotjar era normalizacion lingüistica der aranés e, a trauès de diuèrsi gags, tractarà es errors e dubtes mès comuns qu’apareishen en emplec abituau dera lengua pròpria d’Aran, damb era finalitat d’apropar era lengua a un public extens en un format pòc explotat enquiara.
“Damb aguesta produccion non sonque trabalham ena normalizacion dera lengua, senon que tanben dam visibilitat ath gran talent que i a ena Val d’Aran”, asseguraue era sindica d’Aran, ath temps qu’arregraïe a totes es persones que i an participat “era sua dedicacion e volontat de collaborar en impuls der aranés”.
‘Èm çò qu’èm’, que recentment a estat finalista as Prèmis de Comunicacion Locau de Catalunya, s’estree aué e compdarà damb 12 capitols d’entre 4 e 5 menutes que s’emeteran cada dijaus setmanaument.
