Es Pompièrs dera Generalitat e es Pompièrs d’Aran an dat per estabilizat eth huec forestau que creme des deth dimenge pera net enes poblacions d'Arties e Gessa ena Val d’Aran qu'a cremat 215 ectares de pastures.
Segontes informèc Marc Castellnou, inspector cap der airau GRAF, eth huec a evolucionat favorablaments pendent era net e pendent eth maitin 30 efectius damb eth supòrt de dus elicoptèrs an trabalhat enes dues zònes actives deth huec. Eth flanc dret ei estabilizat e er esquèr demorarà confinat enquiath sòn escandiment.
Era meteorologia des darrèri dies damb inversion termica enes zònes nautes en Pirenèu a estat extrèmaments shuta e a hèt qu'eth huec evolucionèsse rapidaments.
Era prevision ei que damb eth cambi de temps e es nheuades fèbles que se demoren entà aué ena Val d’Aran eth huec demore escandit.
Eth sindic d’Aran, Carlos Barrera a arregraït a toti es servicis implicadi tant dera Val d’Aran coma es dera Generalitat de Catalonha e es grops d'actuacion forestau (GRAF), era sua dedicacion e professionalitat entà afrontar aguest episòdi.
