28.09.2021 |
Viure als Pirineus

RESCATS DE MONTANHA

Era Val d’Aran compdarà damb un elicoptèr entàs rescats de montanha

Damb aguest elicoptèr, Pompièrs-Emergéncies guanharà agilitat en temps de responsa deuant es rescats de montanha

Pompièrs d'Aran
Damb aguest elicoptèr, Pompièrs-Emergéncies guanharà agilitat /CGA
Era Val d’Aran compdarà damb un elicoptèr entàs rescats de montanha

Eth Conselh Generau d’Aran a trèt a licitacion un contracte de noliejament d’un elicoptèr e eth servici de dus pilòts entà qu’es Pompièrs d’Aran poguen amiar a tèrme rescats de montanha en nòste territòri.

“En aguesti moments, quan ei de besonh amiar a tèrme un rescat en zònes de montanha dera Val d’Aran, mos cau depéner dera disponibilitat des elicoptèrs de Bombers dera Generalitat, çò que supause un temps de demora fòrça mès elevat que dificulte eth trabalh des nòsti Pompièrs e aumente eth risc de qu’es victimes patisquen maus majors”, explicaue era sindica d’Aran, Maria Vergés, en tot híger que: “ei pr’amor d’açò qu’eth govèrn d’Aran a decidit contractar es servicis d’un elicoptèr e dus pilòts, entà minimizar eth temps de responsa deuant des accidents de montanha e agilizar eth trabalh des Pompièrs”.

Eth Conselh Generau d’Aran, deuant dera impossibilitat de qu’es Pompièrs d’Aran poguen accedir ar elicoptèr de rescats dera Generalitat de Catalunya, a decidit licitar era contractacion d’aguest servici que serà en funcionament pendent aguest ostiu

Eth Conselh Generau d’Aran invertirà 290.000€ en aguest contracte, que s’alongarà enquiath 31 de deseme de 2021 e non descarte tornar-lo a licitar tar an que ven s’er accès as mieis e equipaments qu’era Val d’Aran a de besonh non melhoren. Es aufèrtes pòden presentar-se enquiath 3 de junhsèga (inclodit).

Cau rebrembar qu’eth Conselh Generau d’Aran dejà anoncièc eth passat mes de hereuèr un recors contenciós administratiu contra era Generalitat de Catalunya pr’amor der incompliment der Acòrd Institucionau de gestion integrau d’emergéncies en Aran, aprovat en an 2019 pera Comission Bilaterau Generalitat – Conselh Generau.

Damb aguest elicoptèr, Pompièrs-Emergéncies guanharà agilitat en temps de responsa deuant es rescats de montanha, pr’amor qu’enquia ara depenien des elicoptèrs de Bombers dera Generalitat, çò que supause depéner dera sua disponibilitat e amendrirà eth desplaçament

Eth motiu d’aguest recors ei que, pendent es mesi de gèr e junh de 2020, era Generalitat de Catalunya aqueric 92 veïculs autobombes e 263 veïculs leugèrs destinadi ath còs de Bombers dera Generalitat, sense que cap d’aguesti veïculs age estat destinat entara Val d’Aran, en tot incomplir-se atau er apartat 5 dera clausula 11 der Acòrd Institucionau, que determine que, pendent eth periòde de transicion entara implementacion deth modèl de gestion integrau d’Emergéncies per part deth Conselh Generau d’Aran, eth departament d’Interior aportarà es veïculs de besonh entath servici des Pompièrs d’Aran d’acòrd damb es critèris generaus qu’era Direccion Generau de Prevencion, Extincion d’Incèndis e Sauvaments aplique entà distribuir e destinar es veïculs des Bombers dera Generalitat de Catalunya entre es diferents parcs de Catalunya.

En aguest sens era sindica d’Aran a declarat que “ara que dejà ei constituït eth nau govèrn dera Generalitat, demoram poder parlar damb es nòsti interlocutors entà solucionar aguest conflicte damb eth departament d’Interior e que se complisque damb er acòrd institucionau”

Era Val d’Aran compdarà damb un elicoptèr entàs rescats de montanha
Comentarios