Era sindica d’Aran, Maria Vergés, s’a amassat aué en Graus damb eth president dera Comarca de La Ribagorza, Marcel Iglesias, damb qui a abordat era forma de refortir es istorics ligams entre andús territòris e ampliar eth dialòg, era collaboracion e eth trabalh conjunt en diferents airaus deuant des rèptes de futur comuns.
“Entath govèrn deth Conselh Generau d’Aran ei de vitau importància mantier e suenhar es relacions de cooperacion damb es territòris vesins, pr’amor que consideram qu’ei era melhor forma d’abordar uns rèptes compartits en matèries coma eth desvolopament comerciau e toristic e era gestion administrativa des servicis publics entath benèster dera nòsta ciutadania”, afirmaue era sindica d’Aran.
Es interèssi d’Aran e era Ribagorza convergissen istoricament jos eth marc compartit des Pirenèus. En aguest contèxte, se compartissen interèssi coma era candidatura des Jòcs Olimpics d’Iuèrn 2030, era gestion des emergéncies e des servicis sociaus o era melhora des comunicacions.
Entre d’auti ahèrs, era metuda en foncionament eth passat mes de junh deth Camin de Santiago Aran-Pirenèus reflectís era vertebracion deth supòrt entre Aran, Ribagorza e era rèsta de comarques involucrades en un projècte que connècte es recorsi toristics interterritoriaus.
