Era sindica d’Aran, Maria Vergés, acompanhada pes alcaldes de Bossòst e de Les, Amador Marqués e Andreu Cortés, a amiat a tèrme ua visita tàs espacis enes qu’eth govèrn deth Conselh Generau d’Aran desvolope d’un temps ençà projèctes importants entath Baish Aran.
En Bossòst visitèren, d’un costat, er antic cinèma, proprietat enquia hè pògui mesi deth Bisbat d’Urgell e qu’a estat aquerit recentaments peth consistòri entara sua reabilitacion dempús de fòrça ans barrat. Er Ajuntament e eth Conselh Generau d’Aran acordèren hè uns mesi eth supòrt deth Conselh tath finançament des trabalhs de melhora e condicionament d’aguest espaci, damb er objectiu de plaçar en aguesta infraestructura un Centre Culturau e Economic, que dinamize eth teishit empresariau e emprenedor deth municipi e pogue acuélher tanben actes diuèrsi.
D’un aute costat, visitèren er espaci a on se plantege que sigue plaçada era Escòla de Rescats en Montanha ena qu’eth govèrn d’Aran pòrte tres ans trabalhant dera man de Pompièrs Emergéncies, eth HUB d’Innovacion HèPic e professionaus extèrns. Un centre de formacion damb un espaci de simulacion de rescat damb elicoptèr a dimensions reaus a on poder simular es manòbres de rescat laguens dera nau. Aguest equipament compdarie damb un simulador d’operacions SAR que contemple tecnologia punta a nivèu mondiau entara simulacion d’operacions que permeterie ad aguest centre esdevier un punt de trobada a nivèu nacionau en matèria d’innovacion en operacions, protocòls e actuacions a trauès de mieis aerians.
Tanben an visitat eth terren a on se contemple eth plaçament dera Escòla de Rescats en Montanha
Un projècte innovador, qu’ajudarie a diversificar era economia dera zòna e que permeterie plaçar Aran coma territòri de referéncia en aguest airau, pr’amor qu’en Euròpa sonque i a un centre damb aguest tipe de formacion e caracteristiques, plaçat en Alemanha.
Atau madeish, se prevé qu’aguest centre age tanben un airau de formacion damb aules adaptades que se place en Les.
