Aguesta madeisha setmana, era Escòla Garona de Vielha ven de signar eth convèni entà aderir-se ath projècte educatiu solidari “Namana”, que coordine era ONG Agua de Coco.
Damb aguest convèni, eth centre favorirà qu’er alumnat de Primària (2au, 5au e 6au cors), participe en un projècte solidari damb alumnat deth 3au mon (païsi coma Madagascar o Cambòia, entre d’auti), en tot generar un escambi culturau e de realitats entre es diuèrses societats qu’i participen.
“Namana” preten balhar valors de patz, respècte, tolerància e, sustot, solidaritat, a trauès dera Agenda 2030 e deth compliment des ODS (Objectius de Desvolopament Sostenible). Atau, eth projècte ei distribusit en 3 sessions (ua per trimesadèr): Ua prumèra ena qu’aurà lòc era presentacion dera ONG, damb un vidèo explicatiu damb era mainadèra deth país deth 3au mon participaire, entà mostrar era diferéncia d’estil de vida des escolans. Era dusau session consistís en ua vidèo-conferéncia entre es centres entà qu’es escolans se poguen conéisher e interactuar entre eri. E, ua tresau session, damb er emplec des ODS, en tot tractar tematiques comunes, coma pòt èster eth clima. Ath delà des sessions, i aurà un rèpte qu’auràn de desvolopar des deth centre.
Agua de Coco ei ua fondacion que pòrte mès de 30 ans en tot trabalhar en païsi deth 3au mon (Madagascar, Cambòia, Brasil, eca), damb era educacion coma motor de desvolopament, en tot lutar contra era explotacion infantila.
“Des der Ajuntament de Vielha e Mijaran credem qu’aguesta ei ua grana escadença entà qu’es escolans poguen conéisher d’autes realitats, en tot interactuar e cooperar damb mainadèra de païsi deth 3au mon”, comente eth 2au tinent d’alcalde e còsso d’ensenhament de Vielha e Mijaran, Alberto López. E ahig que “damb aguest projècte, es escolans apreneràn valors que lis ajuden de cara ara sua vida adulta, e, en aguest sens, des der Ajuntament collaboraram e ajudaram ara Escòla Garona en aquerò qu’age de besonh entà amiar endauant eth projècte Namana”.
